Pemutus nyaman Petronas dipuji

“Sida (Petronas) meseti bebasaka undang-undang sereta meri nitihka peminta (Perintah Sarawak).”

KUCHING: Pengawa Perintah Sarawak nyaman Petronas bagi mutarka isu Chukai Jualan Nengeri (SST) ti bedau dibayar siti pengawa ti patut dipuji.

Siku Luyar, Shankar Ram Asnani madahka lebuh Sarawak enggau Malaya numbuhka Malaysia maya nya undang-undang nengeri nyadi seikas undang-undang Perintah Besai ba baruh Seksyen 73 Akta Malaysia ti meseti dipebasa.

Ku iya, undang-undang baka Akta Perlombongan Minyak meseti diperati laban undang-undang tu ukai undang-undang biasa laban udah nyemetak dipasuk dalam Akta Malaysia.

“Sida (Petronas) meseti bebasaka undang-undang sereta meri nitihka peminta (Perintah Sarawak).

“Enti sida enda bebasaka undang-undang tu, kitai nadai jalai bukai kelimpah mai pekara tu ngagai kort,” ku iya.

Shankar bejaku munyi nya lebuh ditanya pemberita pengudah meda Pekit Tanda Lumba TDA di Cityone ditu, kemari.

Lebuh ditanya pasal saman ari Perintah Sarawak nuju Petronas, iya madah Petronas nyentukka diatu agi bedau bebunyi.

“Aku ngasaika sida patut mutarka pekara tu, lalu aku ngasaika Menteri Besai (Tun Dr. Mahathir Mohamad) nemu nama peminta Sarawak.

“Menteri Besai (Tun Dr. Mahathir Mohamad) deka ngambi pemutus ti manah,” ku iya.

Kena 21 November nyin kemari, Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Datuk Sharifah Hasidah Sayeed Aman Ghazali ngenukuka Perintah Sarawak udah ngaga surat saman enggau keretas nuntut di opis Kort Tinggi di Kuching ngagai Petronas laban kompeni besai menua nya enggai mayar Chukai Jualan Nengeri (SST) ke atas produk petroleum ba baruh Ordinan Chukai Jualan Negeri 1998.