KUCHING: Pengawa nyiri Datuk Seri Ismail Sabri Yaakob nyadi Sapit Menteri Besai (TPM) enggau Datuk Seri Hishammuddin Tun Hussein nyadi Menteri Kanan Luar Nengeri engkeman amat lebuh berundingka gaya politik menua ke benung ‘angat’ diatu.
Sekretari Besai Gempung Parti Sarawak (GPS), Datuk Seri Alexander Nanta Linggi madah, nengah pengawa nyiri ke baru nya GPS ngarapka tu ulih nentuka semua orang ngemeratka isu ke besai agi diatur.
Ku Nanta, kelebih agi isu bekaul ngintu pengelantang enggau pengelikun rayat sereta ngemanahka ekonomi menua maya napi pandemik Covid-19 tu.
“Lebuh nyadi tuai, semua kitai mesti sedarka rayat semampai ngemata nama utai ke benung nyadi diatu lalu pekara pemadu beguna nya, mayuh orang enda setujuka gaya politik ke tau ngeruga pengelikun menua.
“Nya kebuah, aku ngasaika pengawa nyiri dua iku tuai ke bisi penau kediri empu tu engkeman amat ngesan tanggung pengawa besai tu,” ku iya nerang.
Nanta madah, iya temegah ati enggau chara Ismail Sabri bejalaika pangku pengawa lebuh iya nyadi sapit iya di Opis Menteri Pemansang Menua Pesisir enggau Wilayah (KKLW) sereta bisi pengandal iya ulih gawa enggau manah nyadi Sapit Menteri Besai.
Pia mega, iya muji penyulut Hismamuddin sereta penau iya mutarka penusah bilun MH370 ke lenyau suba.
“Nya alai, aku minta Datuk Seri Hishammudin Tun Hussien ti ngetuaika Kluster Pengelikun ngemeratka isu pengelikun di Sarawak.
“Tu nyengkaum 16 bilun China ti tama nadai pemendar ngagai adan menua ba langit Malaysia semak Sarawak ujung bulan Mei tu tadi kelimpah kapal pematau tasik China ti tama semak Beting Patinggi Ali, Sarawak pun bulan June tu tadi,” terang iya.
Iya andal sereta pechayaka pengawa nyiri dua tuai nya deka meri peluang baru ngagai menua ngambi besaup ngelaban pandemik Covid-19 ngambi menua kitai likun baka selama.
