KUCHING: Pakatan Harapan (PH) alah Pengawa Bepilih Mit (PRK) Tanjung Piai patut nyadi teladan sereta diperatika Perintah PH.

Kaban Parlimen Kuching Dr Kelvin Yii madahka PH alah di Tanjung Piai patut dikena sida ngemanah sereta nyeleti genap pengurang enggau pengelemi kandang setaun setengah megai menua tu.

“Peminta rayat nya pekara besai sereta berat… nya alai kitai patut bebasaka ‘peminta’ rayat nengah PRK.

“Taja PH alah besai dalam PRK Tanjung Piai tang kitai enda patut putus pengarap lalu beratika tiap danji enda tau enda dikeamat ngambika pengelantang ulih diasai genap rayat nadai ngira bansa, pengara tauka asal penatai.

“Pemutus PRK tu teladan ngagai Perintah PH ngambika bebendar agi nangkup peminta rayat Sarawak awak enda tinggal dalam pemansang dibai pengari rayat PH,” ku iya madah nyemetak.

Kelvin madah munyi nya lebuh dirandau pemberita ba Program Meri Darah, Beperesa Pengerai Nadai Bebayar enggau PeKa B40 ba sebengkah palan bebelika barang ditu, tadi.