Pemutus Soon Koh betul, patut

KUCHING: Pemutus Wong Soon Koh nyurutka diri ari penuduk menteri kabinet nengeri endang betul sereta patut ku Chairman Parti Sa’ati Rayat Sarawak (SUPP) Simanggang Datuk Francis Harden Hollis.

Ku Harden, Wong Soon Koh ti nyadi presiden Parti Sarawak Bersatu (PSB) endang patut ngaga pemutus baka nya laban PSB ukai sebagi ari parti komponen Gabungan Parti Sarawak (GPS).

“Enti ngasai nadai ba gempung GPS, endang patut nyurutka diri lalu parti nadai disengkaum ba perintah nengeri diatu.

“Pia mega ba penuduk bukai baka sekretari politik, presiden tauka kaunsilor ari PSB endang enda patut mangku pengawa ba kabinet nengeri,” ku iya madah nyemetak.

Harden mansutka jaku nya lebuh dirandau pemberita pengudah bejadi Nutup ‘Kem Jati Diri Perintah Servis Komuniti Zon Sarawak, Sabah enggau Wilayah Persekutuan Labuan di Palan Latih enggau Kem Eko Sumiran ditu pagi tadi.

PENERANG… Harden nerang ngagai pemberita di Palan Latih enggau Kem Eko Sumiran ditu, tadi.

Nangkan nya ku iya, sida ari SUPP mega meragam kebuah ti sama diputuska Menteri Muda Perengka Pengangkut Datuk Jerip Susil ti nyurutka diri ari PSB.

“Enti agi ba PSB, iya ukai siku ari kaban parti GPS.

“Engka nya kebuah iya berumban ningkilka diri ari PSB,” ku iya.

Kelimpah ari nya ku Harden, SUPP seruran nerima pemulai sereta nukangka pintu parti sida ngagai Jerip.

“Sida kala besemaya deka pulai ngagai parti kami, tang nadai kala ngamatka semaya diri.

“Taja pia kami tetap nerima pemulai sida laban enti begempung dalam SUPP, sida ulih ngetanka penuduk ba Kabinet Nengeri.

“Lalu semua pemutus tu bepanggai ba Kepala Menteri Datuk Patinggi Abang Johai nentuka kuing pejalai sida,” ku Harden madah nyemetak.