Penakan Iban bemain ba Liga Amerika Syarikat

KUCHING: Siku pemain bol profesional Amerika Syarikat (AS) ke ngembuan darah penaka Iban ari Seruai, Spaoh Betong kala ditanya tim Sarawak nyadi pemain import luar ngambika bemain enggau Liga Malaysia 2020.

Isaac Angking

Isaac Angking, 20 diatu pemain tengah Kelab Main Bol Liga Besai Revolusyen New England kala pulai kemisi seraya ke nemuai kitu. Iya mega nguna kemisi nya belatih enggau tim Sarawak laban bisi siku bakih iya endang pemain tim Sarawak.

Mandal Presiden Gerempung Main Bol Sarawak (FAS) Philip Jabu madah, niat deka ngambi Isaac tejanggal laban iya agi ngembuan kontrak enggau kelab main bol di AS.

“Mayuh pekara ke patut digaga enti kitai deka mai iya masuk tim kitai (Sarawak). Tambah mega, Isaac agi nyambung pelajar ba menua endur iya ada.

“Isaac mega madah iya agi nitihka pekat enggau kelab main bol di AS lalu bedau sedia pindah ari menua asal iya nya,” ku iya maya dirandau Suara Sarawak, apin lama ke udah.

Philip madah, Isaac endang ngembuan pengelandik bemain bol lalu penau iya nya chukup manah nyema iya diberi peluang bemain enggau Liga Malaysia.

Ku iya, berasai temegah laban bisi pengari pemain bol ke penakan Iban ari Sarawak bemain ba liga profesional.

Nitihka penerang mega, aki Isaac iya nya Kolonel (R) Dunstan Nyaring Angking ke asal ari Tanjung Paku, Betong ke mega siku Bujang Berani Iban keterubah mangku pangkat kolonel dalam Soldadu Menua Malaysia (ATM).

Apai Isaac peranak Amerika Syarikat lalu indai iya bansa Iban ari Betong.

Suara Sarawak