Penakan Melanau dikelalu masuk PMK

KUCHING: Komuniti Melanau ti diau di pelilih Kuching Samarahan, Lundu enggau Bau diperansang ngerejister diri enggau Gerempung Melanau Kuching (PMK).

Presiden PMK ti mega nyadi Adun Tellian Yussibnosh Balo madahka pengawa ngerejister diri nyadi kaban PMK ukai semina tebuka ngagai sida ke tulin Melanau tang mega ngagai sida ti datai ari ruang bilik penakan Melanau.

“Kami seruran nerima penatai sida ngerejister diri enggau PMK laban sida endang peturun Melanau.

“Anang irauka penanggul dalam berandau ngena jaku bansa bukai laban komuniti Melanau endang ngembuan jaku ti enda sama,” ku iya.

Yussibnosh madah munyi nya lebuh bejadika Program Hari Keluarga PMK di Wisma Melanau ditu, pagi tadi.

Nangkan nya ku iya, chengkeran PMK semina RM60 seumur idup lalu nadai agi bayar ninting taun.

“Tu ngambika ngemuntangka agi pengawa sekretariat nusun data profil raban peturun Melanau ba mengeri tu,” ku iya.

Yussibnosh mega madahka sida nagit lebih 2,000 komuniti Melanau ngerejister diri enggau PMK ba pelilih Kuching laban naka ke diatu semina 1,200 iku aja udah ngerejister diri enggau sida.