KUCHING: Opis Menteri Penyerakup Bansa (KPN) deka berundingka atur nambahka Tabika Perpaduan (penyerakup) baru, bepelasarka peminta enggau sukung ari semua pupu bansa ba sesebengkah endur.

Menteri iya, Datuk Halimah Mohamed Sadique madah, atur nya seriris enggau konsep penumbuh tabika penyerakup ke udah ditetapka.

“Ungkup tuju nya, kitai deka ngaga pansik bekaul enggau peminta semua bansa ti ngarika apai indai ba sesebengkah endur.

“Naka tu, kitai bisi 1,781 buah tabika penyerakup ba selampur menua,” ku iya.

Iya mansutka pekara nya ba aum pemberita ke diatur ba Tabika, Semeba ensana.

Nangkan ke nya, ku iya raban KPN diatu benung ngatur genap tabika ke udah dibuka dikena nentuka semua nembiak datai ari semua bansa seriris enggau atur ke udah ditetap kenyau ari pun.

Kelimpah nya, Halimah mega madah raban sida benung ngemansangka pelin pelajar tumu anak mit ba genap tabika penyerakup dalam timpuh 10 taun berengkah ari 2021 nyentuk 2030.

“Pelin tu chukup beguna dikena nerenak ulah beserakup ari pun iya nya ba raban nembiak kenyau ari mit.

“Bisi sekeda pugu ke dipejalaika dibaru sekeda atur strategik ke dikemansang nyadika malin bala pengajar ba Tabika Perpaduan,” ku iya.

Nerang silik iya mega madah raban KPN udah bejadika sekeda bup baru dikena negapka penyerakup ba raban nembiak tabika.

Tu nyengkaum bup malin ungkup bala pengajar, sereta dikena ngemuntangka pengawa belajar enggau ngajar ke sistematik sebaka enggau palan pelajar tumu ke bukai.