Hope Place Kuching bisi ngabas peranak menua nya seraya nyuaka bantu

INFO

“Ketegal nadai perengka pengangkut mayuh nembiak genturung pendiau nya nadai besekula, nya kebuah Gerija St. Paul Long San ngaga kelas belajar ungkup nembiak dia ti dikumbai ‘Amai Medai’ lalu dibantu tiga iku nembiak ti baru abis sekula Pom Lima.”

KUCHING: Gerempung Pengelantang Pendiau Hope Place Kuching (Hope Place) bisi ngelawa sereta meri bantu ngagai peranak Penan di Kampung Apau Nyaring enggau peranak Kampung Long Liaw di Baram.

Ku Pemungkal Hope Place, Kelvin Wan serak tu sida dibantu Gerempung Pengasih Nadai Betatak (CWB).
“Pengawa tu mega disereta Kelab 4×4 Bintulu ti mai barang pemakai, barang ubat, perengka ngubat ngeli, lampu solar enggau perengka sekula ngagai peranak Penan dia.

“Kami ngepunka pejalai kena pagi 20 Julai ari Bintulu ti ngambi 10 jam pejalai lalu datai ba Sungai Tinjar nuju ngagai Kampung Apau Nyaring,” ku iya.

Kelvin bejaku munyi nya ba siti penerang media, apin lama.

Ku iya, Kampung Apau Nyaring tu diuan 100 peratus bansa Penan ari 43 buah pintu lalu mayuh ari sida nadai bisi kad pengelala.

“Sebaka enggau kampung bukai sida dia nadai karan enggau bekal ai beresi lalu lutur terebai semina ngelawa sekali dalam timpuh dua bulan.

“Ketegal nadai perengka pengangkut mayuh nembiak genturung pendiau nya nadai besekula, nya kebuah Gerija St. Paul Long San ngaga kelas belajar ungkup nembiak dia ti dikumbai ‘Amai Medai’ lalu dibantu tiga iku nembiak ti baru abis sekula Pom Lima,” ku iya.

Tambah Kelvin, bisi 24 iku nembiak ti besekula dia tang sida begunaka mija, bangku, papan belajar enggau perengka sekula ti bukai dikena belajar.

“Udah nya, kami lalu nyambung pejalai ngagai Long Liaw mudik nengah jalai ai dua jam nengah jalai darat sereta sejam setengah bebatak nengah jalai ai ti langkang.

“Long Liaw bisi 35 buah pintu ruang bilik iya nya lebih 100 iku peranak ti sama nadai karan enggau bekal ai beresi.

“Ku Ketuai Kampung dia Bitang Sakai 10 peratus ari peranak kampung nya nadai ngembuan kad pengelala,” ku iya.

Kelimpah ari nya, ku iya peranak kampung nya mega begunaka ‘kerusi roda’ laban napi penyakit strok.

“Sebaka enggau Kampung Apau Nyaring, Long Liaw mega agi kurang palan endur besekula sereta nadai perengka dikena belajar.

“Sida semina bepanggai ngagai anak indu Bitang iya nya Angel Jeli ti baru abis sekula Pom Lima ngajar ba kampung.
“Ku Angel, iya merambu deka nyambung sekula ngagai tikas ti tinggi agi udah tu seraya ngerunding bala nembiak ti deka belajar ba kampung nya,” ku iya.

Kelvin nambah, CWB lalu mantu barang pemakai baka berau, minyak makai, gula, mi, kuie, ai irup, perengka sekula enggau ‘kerusi roda’ ngagai peranak kampung nya.

Barang sapa deka mantu gerempung tu tau meri bantu nengah Maybank ba lumur 5112-8900-1160.