Penanggul ai di Sibiew-Similaju diputar

SAMALAJU: Penanggul bekal ai beresi ba sitak menua Sibiew-Similajau deka diputarka enggau lengkas dikena nyungkak ka pengelantang pendiau rakyat di menua tu.

Kaban Kunsil Negeri (Adun) Samalaju Majang Renggi madahka, penanggul tu nyadi ketegal penatai ai ti enda deras diserumbaka enggau batang paip ke mit.

“Penanggul tu deka diputarka lengkas lalu pengawa ngaduka bekal ai beresi di sitak menua tu deka tembu ba taun 2021,” ku iya.

Majang mansut ke jaku nya ba Pengerami Begulai Enggau Rakyat serta Nyambut Taun Baru 2020 ba Rumah Seliong Anak Lugat, Tinting Keresang, Batu 36, Jalai Bintulu-Miri, tengah hari tadi.

Ku Majang madah, diatu pengawa niri tauka ngaga tangki tinggi dikena nyimpan ai lalu meri tekanan ai benung digaga ba dua bengkah endur iya nya ba Simpang Bakun enggau ba Maskat.

“Taja pen diatu kitai meda batang paip udah bisi sebelah nisi jalai tang ai nya enda ulih dibekal ngagai genturung pendiau laban tikas pengelaju naka diatu bedau chukup,” ku iya.

Ba pengerami nya, Majang meri RM10,000 dikena JKKK rumah panjang nya lalu RM5, 000 ungkup Biro Indu sida.

Suara Sarawak