SIBU: Penanggul peneras ai ti lubah ba sekeda sitak ba Sibu Jaya disadang deka diputar ba suku keterubah 2024.
Penulung Menijar Besai Kaunsil Ai Sibu (LAS), Siew Kok Kiong madah, penanggul peneras ai ti lubah ti nyadi maya jam kiruh deka diputar enti Projek Bekal Ai Knaowit Renggat II tembu ila.
Ku iya, Menteri Utiliti enggau Telekomunikasyen, Datuk Julaihi Narawi udah mantaika pekara nya kena Hari Minggu tu tadi pengudah ngabas taba projek nya.
“Kelimpah ari flat Sibu Jaya, sitak bukai baka Eco Garden enggau Sibu Jaya enda agi napi penanggul ai enti Projek Bekal Ai Kanowit Renggat II ba suku keterubah 2024 tembu ila baka ti dibantai menteri nya empu sereta deka meri pemaik ngagai komuniti ba flat Sibu Jaya ditu.
“Bisi 700 unit rumah flat ti napi penanggul tu deka bulih pemaik enti projek bekal ai Kanowit tu udah tembu ila,” ku iya.
Kok Kiong mansutka jaku nya rambau aum pemberita bekaul isu ai ba Sibu Jaya ba Bilik Aum Pemun, Kaunsil Pelilih Menua Pesisir Sibu (MDLBS) ditu, ensanus.
Lebuh dirandau bekaul pun penyadi penanggul peneras ai nya ti udah lama ditapi komuniti ba Sibu Jaya, Kok Kiong madah, penanggul nya bepun ari tangki ai sida ba ringkat dua enggau tiga bepalan ba ringkat pemadu atas enggau pemadu baru.
Ku iya, penanggul nya mega bepun ari pengawa nyambung paip baru berebak ari pengawa nyeleti rumah komuniti dia.
