Penanggul arus penyambung lubah ba Batu Kawa teputar

KUCHING: Bisi 10 buah palan di sitak Batu Kawa napi penanggul arus penyambung ti kelalu lubah taja enda jauh ari mengeri besai.

Menteri Kaunsil Kandang Menua enggau Pengawa Berumah ti mega Adun batu Kawa Datuk Sri Prof Sim Kui Hian madahka endur tu suah mantaika bekaul enggau penanggul tu arus penyambung ti lubah tu iya nya Jalai Segubang, Jalai Kim Choo Sin, SMK Min Lit, Taman Putra Park, SJK Chung Hua Rantau Panjang, Jalai Ping Yung Selatan, Borneo Happy Farm, Moyan, Jalai Sungai Tapang Ulu, SJK Chung Hua Sungai Tapang Ulu.

“Aku udah minta kerejasama ari Opis Multimedia Sarawak (SMA) nagtur servis (service provider) dikena mutarka penanggul tu,” ku iya.

Kui Hian bejaku munyi nya pengudah bejadika pengawa Tanggungpengawa Rama Koporat (CSR) Nambahka Arus Penyambung entara Reach 10 Sdn Bhd ngagai SJK Chung Hua Rantau Panjang ditu, kemari.

Ku iya, sekeda palan tu endang ngembuan pengelaju arus penyambung ti enda manah lalu sekeda palan agi ngembuan tiang pemanchar tang nadai pemeri servis.

“Ambika chunto, sekula tu empu, tiang pemanchar udah digaga Bestari Net (di mua pagar sekula) iya nya projek ari Perintah Besai dikena meri tali arus deras ngagai sekula nengah Komiti Komunikasyen Enggau Multimedia Malaysia (SKMM) tang pemeri servis enggai ngambi bagi.

“Nya kebuah, Perintah Nengeri deka nentuka SMA ngiga chara berunding enggau Perintah Besai mutarka penanggul tu.

“Ungkup sekula, diatu mayuh ripot tauka kelas digaga nengah tali arus, pekara tu deka meri penanggul ngagai pengajar enggau nembiak sekula neruska Pengawa Ngajar enggau Belajar (PdP) sida,” ku iya.

Nangkan nya, Ketuai Pemesai Exsekutif Reach 10 Sdn Bhd Leo Chin madahka, CSR tu diatur dikena meri arus penyampung ti deras ngagai semua kelas nembiak.

“Kami nyendiaka servis arus penyambung ngagai palan ti enda ulih nerima signal baka menua pesisir.

“Enggau SMA, kami udah ngatur lebih 200 palan projek nyambung arus penyambung di menua pesisir,” ku iya.

Sama bisi datai Direktor SKMM Adiman Ajem, Sapit Menijar Besai SMA Hamadlan Hamdan, Kepala Pengajar SJK Chung Hua Rantau Panjang Sim Ying Ming enggau ke bukai.

Suara Sarawak