KUCHING: Projek sapat bah beungkus RM20 juta digaga ba sepemanjai sungai besai nyentuk ke MacDonal MJC ba Batu Kawa dipelabaka deka mutarka penanggul bah ba genturung nya.

Sekretari Politik Premier Sarawak Tan Kai madahka projek tu diperambu ngambika ulih nagang ai bah tama ngagai genturung pendiau.

“Ketegal palan tu baruh, benteng nagang bah digaga awakka ai enda tama ngagai genturung pendiau.

“Projek tu sama konsep enggau menua Holand, menua Holand ngembuan tanah ti baruh nya alai sida ngaga benteng nagang bah awakka ai enda tama ngagai genturung pendiau rayat sida,” ku iya.

Tan Kai bejaku munyi nya lebuh ditanya pemberita pengudah ngarika Sapit Premier Sarawak Datuk Seri Dr Sim Kui Hian bejadika Program Riuh Sekampung Kampung Sinar Budi Batu Kawa ditu, kemari.

Ku iya, pengawa tu agi ba renggat diperambu ari Opis Parit enggau Entali Ai (DID).

“Langkar udah tembu lalu agih belanja udah dikemedarka Premier Sarawak.

“Dipelabaka berengkah taun tu, aku empu udah meda langkar, ari ni nyentuk kini projek tu ila.

“Ari nya, mensia mayuh ulih ngatur aktiviti ba palan nya baka sesais, main basikal, lumba enggau ulih mega nyadi palan dagang temuai,” ku iya.

Iya ngelansa pekara nya lebuh ditanya pasal projek mutarka penanggul bah ba kandang menua Batu Kawa.

“Mayuh projek nagang bah digaga ba kandang menua Batu Kawa, bisi projek timpuh pandak, timpuh tengan enggau timpuh panjai.

“Entara projek bukai iya nya numbak parit ngambika besai enggau dalam agi sereta ngaga parit semin ari Lorong 20 nyentuk Lorong 17, ke alai projek tu benung dipejalaika.

“Nyau deka ninting bulan, endang bisi projek nagang bah digaga ba genturung tu,” ku iya.