KUCHING: Penguna di bagi menua Betong enggau pelilih mit Spaoh deka bulih bekal ai berenggat bekau ari penanggul bisi tiris maya kereja nyeruri paip di Simpang Layar.
Opis Bekal Ai Menua Pesisir (JBALB) udah ngadu pengawa nukar pun paip 300mm di Loji Ai Beresi Lubau seriris enggau notis penanggul bekal ai ti ditagaka kena 20 November ari pukul 10 pagi nyentuk pukul 8 malam.
Menteri Utiliti Datuk Sri Stephen Rundi madah, maya penanggul tu nyadi kunteriktor Pan Borneo mega benung bejalaika pengawa nyambung paip 800mm MSCL di Simpang Layar.
“Taja pia, pengawa nya nadai ulih ditembuka nitihka taga ti udah ditetapka iya nya pukul 8 malam.
“Nya alai, pengawa nya deka disambung baru hari siti (kemari),” ku iya dalam siti penerang media kena 11 November tu tadi.
Ngelansa silik agi pasal penanggul tu, JBALB udah ngeluarka notis pasal penanggul bekal ai enda disadang ungkup kereja nyeruri nya.
Berebak enggau nya, ungkup jalai alternatif, JBALB udah mekalka ai ngagai raban penguna di palan ti kena pangka ngena tangki ai mindah.
“Operasyen nganjung bekal ai ngena tangki ai mindah digaga mungkur palan Sepital Betong, palan berumah Taman Kenanga Indah, palan berumah Taman Satria, Sekula Sekondari St. Augustine, Sekula Sekondari Datuk Patinggi Kedit enggau palan besemak di bagi menua Betong ti begunaka ai.
“Pia mega, pengawa nganjung bekal ai udah dipejalaika ngena semilan tangki bekal ai mindah iya nya lima unit ari JBALB seraya ke bukai datai ari bantu raban tuai dia,” ku iya.
Raban kunteriktor mujur nembuka kereja nyeruri peniris paip urung pukul 3.30 lemai kena 12 November.
Ku iya, JBALB deka terus meri penerang bekaul gaya pengerembai pengawa nyeruri paip sereta status bekal ai nengah media rasmi facebook, twitter enggau laman web JBALB.
Raban Opis Utiliti Sarawak begulai enggau JBALB nyamin deka terus meri komitmen enggau ngatur bekal ai ba palan ti napi penanggul.
