ARTIKEL

Penanggul bekal ai di Engkilili deka diputar nengah RMK12

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Penanggul rumah panjai di Engkilili apin disambung bekal ai beresi deka diputarka nengah Projek Pemansang Perambu Sistem Bekal Ai di Engkilili Bagi Menua Sri Aman ba baruh Langgur Pemansang Malaysia Lumpar ke-12 (RMK12).

Menteri Muda Utiliti enggau Telekomunikasyen Datuk Liwan Lagang madahka iya udah minta penerang ari Opis Bekal Ai Menua Pesisir (JBLAB) pasal pekara nya.

“Penerang JBALB madahka, skop bagi projek tu nyengkaum ngaga batang paip, tekat, stesyen pengalak enggau pengawa bukai.

“Komponen projek tu mungkur sereta deka meri pemaik ngagai genturung Brayun ke Kampung Basi, Kampung Spalau, Kampung Ensurai, Kampung Empelam, Kampung Geligau, Kampung Tebarong, Kampung Nanga Bunu enggau ari Kampung Memaloi ke Kampung Pentik iya nya urung 670 ruang bilik,” ku iya nimbal pemberita lebuh ditanya bekaul enggau berita ke ayan ba surat kabar sebedau tu.

Iya nandu, pengawa ngatur meri bekal ai beresi nya ulih dipejalaika pengudah Loji Ngubat Ai (LPA) Baru Engkilili (perambu kapasiti 75MLD) enggau Grid Bekal Ai Wilayah Sri Aman mujur digaga ke alai projek tu udah dipadahka ba baruh Pasca Pemansang Covid-19 Sarawak (PCDS) ungkup dipejalaika dalam RMK12 ila.

“Projek tu dipelaba begunaka RM14 juta agih belanja iya nya LPA Baru Engkilili (RM3 juta) enggau Grid Bekal Ai Wilayah Sri Aman (RM11 juta) ngambika Front End Engineering (FEE) ulih dichiri sereta bejalaika pengawa ba taun tu.

“Naka diatu, semina tiga buah kampung ti bisi minta enggau nerima tangki ai nengah Program Tangki Air Kerajaan Sarawak iya nya Kampung Tekalong, Kampung Ensurai enggau Kampung Nanga Bunu,” ku iya.

Dulu ari nya, sekeda peranak rumah panjai ba Engkilili mansutka sebana madahka genturung pendiau sida agi tubah bedau disambung bekal ai beresi ngagai rumah.

Entara genturung ti bedau nerima bekal ai beresi tu iya nya Kampung Ensurai, Kampung Basi, Kampung Tekalong, Kampung Ijok nyentuk Kampung Pak di Engkilili.

Ba taun 2020 suba, Menteri Utiliti Datuk Seri Dr. Stephen Rundi Utom madahka Perintah Sarawak nagit 100 peratus bekal ai beresi deka diberi ngagai serata menua tu dalam timpuh lima taun agi.

Iya madahka, pengawa tu ulih dijapai taja pan mayuh projek nyambung ai beresi ngagai rumah tejanggal bekau pandemik Covid-19.

BERITA LAIN

Pengelanchar kuasa karan sepanjai Sukma dijaga

KUCHING: Opis Menteri Utiliti enggau Telekomunikasyen deka nentu bekal kuasa karan sepanjai Lumba Malaysia (Sukma) XXI 2024 ti deka diatur ba Sarawak lanchar. Sapit Menteri

BERITA TERBARU