PERINTAH Sarawak merambu peranak di selampur Sarawak deka dibungkur bekal ai enggau kuasa karan penuh manggai taun 2025, ku Menteri Utiliti, Datuk Seri Stephen Rundi Utom.
Pengawa ngaga tangki ai Bukit Selatan dipejalai Opis Bekal Ai Menua Pesisir (JBALB) beungkus RM24 juta udah berengkah digaga kena 7 Julai 2018 enggau tembu penuh ba bulan Julai 2021.
“Tangki tu dikena nambahka bekal ai simpan di mengeri Miri laban sebedau tu semina 42 juta liter ke udah ditambah ngagai 69 juta liter.
“Reti iya tadi, enti sema bekal ai tejanggal, tangki nya agi ulih nyendiaka bekal ai di Miri dalam pengelama 6 ngagai 11 jam.
“Terima kasih ngagai Perintah Sarawak dipegai GPS laban udah ngagihka belanja RM4 bilion ungkup 321 bengkah projek bekal ai di baruh Projek Rayat ba selampur menua.
“ Bisi 177 ari 321 bengkah projek udah mujur ditembu taja kitai agi napi pengerekai Covid-19,” ku terang Rundi.
OPIS LAKU DI MIRI Ungkup penerang semua, LAKU Management Sdn Bhd ba sitak tanah tinggi di Bukit Selatan Miri deka bisi indu opis baru baka urup ‘L’ ditimpai ari kandang tasik peninggi lapan ringkat.
Rundi madah, Opis Menteri Utiliti deka bejuraika mosyen pasal bekal ai deka nyadi siti entiti maya Aum DUN ke deka datai.
Ku iya, mosyen nya nentuka bekal ai nyadi komersial laban ai nya siti komoditi enggau industri hydrogen pen ngena ai.
Nya kebuah ku iya, pelin besai grid bekal ai ti dikemansangka kitai deka dibagi ngagai tiga zon.
“Zon Selatan dalam pelin besai nya ari Kuching ngagai Betong, zon tengah nya ari Sibu ngagai Mukah enggau zon utara ari Bintulu enggau kandang menua atas.
LOJI AI DIKEMANAH
Ejensi perintah deka ngemanah loji ai di Bintulu, Nyabau enggau Limbang nentuka kandang menua utara disikap bekal ai beresi penuh.
“Perintah Sarawak ngagihka belanja RM4 bilion dikena ngemansangka pelin besai tu lalu tu agih belanja ke enda kala diagih ngagai opis menteri sebedau tu.
“Nengah agih belanja tu, kitai deka bejalaika 321 projek bekal ai ke alai 177 ari nya udah tembu nyengkaum ngemanah loji ai ke bisi diatu,” ku Rundi.
Ba lansa sama, Rundi madahka Perintah Sarawak semampai betatika penusah rayat lebuh meri diskaun bil karan enggau ai dilanjar nyentuk bulan Disember 2021. Iya madah baru, diskaun entara lima ngagai 25 peratus ngena agih belanja penyampau RM166.8 juta di baruh Pakej Bantu Khas Sarawakku Sayang (BKSS) dilanjar baru enam bulan berengkah Julai nyentuk Disember 2021.
Nya entara inisiatif Perintah Sarawak ngelempung tating penusah rayat napi pandemik Covid-19. Rundi mega madahka diskaun nya meri pemaik ngagai 647,000 penguna ari sektor domestik, komersial enggau industri.
Nya alai, Perintah Sarawak udah ngena belanja penyampau RM583 juta kenyau ari inisiatif tu dipejalai kena April 2020.
