LUBOK ANTU : Bala nembiak sekula ari rumah panjai Nanga Ngemah, Lemanak enggau rumah panjai bukai ke ngelingi nya napi penanggul belajar online ketegal penanggul nadai arus telefon tauka internet ba menua nya.
Kenu ku, Tr Alo anak Kanyan penanggul nya ukai penanggul ke baru ditapi sida ba menua nya tang endang udah lama ditapi sida serumah ari suba nyentukka diatu.
“Ukai kami serumah aja ke napi penanggul tu tang nyau deka sekayu Batang Lemanak tu napi penanggul ke sebaka ari suba lalu apin diputarka nyentukka diatu,” kenu ku Alo mantaika sebana diri.
“Sekumbang atur baru sekula dipejalaika nengah pengawa belajar ari rumah (PDPR) sereta belajar ngena chara online, sinu amat ati kami ke apai indai meda bala anak diri jauh tinggal ba pelajar sekula,” ku tampung iya.
Kenu ku Alo, tudah bala anak sida bendar mansal tulang diri nurun niki bukit ninting hari berengkah Hari Satu nyentuk ngagai Hari Lima begigaka arus telefon enggau internet kena belajar online.
Alo mega madahka kadang-kadang bala nembiak nyau lembau amat mansal diri nurun niki bukit ke nyau kurang lebih 3km ari rumah panjai ninting hari nya pan arus internet enda tentu stabil.
“Aku ngarapka pengari rayat ke udah dichirika rayat ngenataika sebana rayat diri enggau ejensi perintah ke bekaul enggau penusah tu mutarka pekara tu enggau lengkas sereta enda betangguh agi,” kenu ku padah Alo.
“Chukup lama kami ba Batang Lemanak ditu jauh tinggal ari segang pemansang baka ba mengeri.
“Kelimpah ari arus telefon enggau internet ke manah, pekara bukai ke pemadu dipinta sereta diguna kami ba menua ulu iya nya jalai alun ke menyana enggau bekal ai beresi baka ba mengeri,” pia ku sebana Alo.
