Penanggul lebih 30 taun ditapi Rh Esau, Mepi Pasir teputar

LUBOK ANTU: Penanggul jalai alun ti suah ampuh ditapi peranak Rumah Esau, Mepi Pasir di Batang Ai kenyau ari lebih 30 taun teputar enggau penembu projek ngaga baru engkelebat jalai nya.

Menteri Muda Pemansang Industri enggau Pengawa Beranakka Puku Malcom Mussen Lamoh madah, projek nya digaga nengah Program Transformasyen Menua Pesisir (RTP) perintah nengeri.

“Sebedau tu aku kala besemaya mutarka penusah jalai ngelawa Rumah Esau tu ti suah ampuh ngujungka bala ditu enda ulih nengah jalai nya maya ke ampuh ai.

“Nya alai, nengah RTP kitai ngaga engkelebat dikena mutarka penusah ke ditapi lebih 30 taun peranak rumah panjai tu,” pia ku iya madah maya bejadika penembu projek nya, empai lama.

Iya ti mega Kaban Kunsil Nengeri (Adun) Batang Ai madah, perintah nengeri naka alah ngaduka pemansang di menua pesisir lebih agi pekara ti bekaul enggau pengelantang pengidup rayat.

Suara Sarawak