Penanggul rayat di sitak Nangka seruran dipending

SIBU: Kaban Kunsil Nengeri (Adun) Nangka, Dr Annuar Rapa’ee terus chakah bejalaika tanggung pengawa sereta ngelimpangka awak diri nemuai ngagai rumah panjai ba Kemuyang enggau Nangka di Sibu ditu, apin lama ke udah.

Ku iya, tu dikena mendingka peminta enggau penanggul ti ditapi rayat ba rumah panjai enggau bagi menua nya.
Keterubah, Menteri Muda Pelajar, Sains enggau Pansik Teknologi tu nemuai ngagai Rumah Luat lalu nyuaka agih belanja kena ngemanahka rumah panjai nya.

Lebuh ba Rumah Luat, iya ngelimpangka diri berandau sereta begulai enggau peranak rumah panjai nya.

Pengudah nya, Dr Annuar neruska pejalai iya ngagai Rumah Sungo lalu nyuaka bantu kena ngemanahka rumah, masang bekal ai enggau elekterik ungkup empat buah pintu.

Nitih ku iya, nembiak ba Rumah Sungo nyambut manah pemutus Kunsil Nengeri (Dun) Sarawak ngemendarka undang-undang lalu nembiak ke beumur 18 taun ulih ngundi sereta nyadi Kaban Kunsil Nengeri (Adun).

Nangkanka tu, Dr Annuar ke mega Menteri Muda Pengawa Berumah enggau Pengerai Mensia Mayuh nya nampung pejalai iya ngagai Rumah Gelau.

Ba pengawa nya, iya udah nyuaka bantu kena ngaduka rumah sereta ngelandaika tanah ungkup pengawa nampung rumah nyadi 15 pintu.

Berebak enggau tu, Dr Annuar mega limpang ngabas Rumah Chua enggau Rumah Lumbok ba sitak Dun Nangka.

Suara Sarawak