Penanggul rayat nadai taba alai berumah teputar

KUCHING: Projek Skim Nangkir Kampung (SPK) Sadong Jaya nyendiaka 290 lot tanah endur diau ti dipelaba tembu 5 April tu ila deka meri mayuh pengelantang ngagai peranak ba genturung pendiau nya.

KK Adenan Abang Asim

“Aku gaga laban projek tu meri peluang ngagai orang ti nadai rumah ulih ngentak rumah ba tanah lot tu. Mayuh nembiak redak ti dipegai aku ngembuan mayuh anak tang sida nadai tanah endur ngentak rumah.”

KK Mohamad Nafri

“Aku KK Sungai Bilis lalu peranak di kampung aku bisi 67 buah pintu. Aku empu pan begunaka tanah lot endur ngaga rumah laban mayuh anak. Ngarapka kami serumah ti benung begunaka rumah sama bulih projek tu meh awakka bulih pengidup ti lebih meruan.”

Pemancha Awang Azid

“Tu siti peluang ti pemadu manah ungkup mensia mayuh. Kebuah pia laban genturung pendiau kami begunaka mayuh projek ti baka tu. Terima kasih ngagai petara enggau Perintah Sarawak laban udah ngemujurka pengawa tu ke pemaik rayat ditu.”

KK Ramani Pobk

“Aku berasai gaga laban projek tu ulih mantu kami serumah ti nadai ngembuan rumah. Projek tu dibagi ngagai empat buah genturung pendiau, tang aku arapka peranak genturung pendiau bela sama bisi ampit bulih projek tu lebih agi sida ngembuan mayuh anak.”

Suara Sarawak