Penanggul runding mayuh nuntung nembiak

Pansik nunjukka penanggul pengerai runding pemadu tinggi nyadi ba raban nembiak ti berumur entara 16 ngagai 19 taun.

KUCHING: Empat ari 10 iku orang bisi penau ngembuan penanggul pengerai runding dalam pengidup sida.

Menteri Pengerai Datuk Seri Dr Dzulkefly Ahmad madah pansik nunjukka penanggul pengerai runding pemadu tinggi nyadi ba raban nembiak ti berumur entara 16 ngagai 19 taun.

“Nitihka statistik Pansik Pengerai enggau Morbiditi Nasional dipejalai Opis Menteri Pengerai (KKM) ba taun 2015, bisi 29.2 peratus tauka siku ari 10 iku nembiak ngembuan penanggul pengerai runding.

“Lalu tu nyengkaum penanggul pengerai runding ba raban anak mit,” ku iya.

NYADIKA PENGINGAT… Dzulkefly (tengah) begambar begulai enggau bala penyereta Stop Stigma Run 2019 ba garis mula belanda di luar Begunan Dun Lama, kemari-GAMBAR NURUL FAZLYN

Dzulkefly madah munyi nya lebuh bejaku ba pengawa bejadika Stop Stigma Run 2019 ba lur Begunan Dun Lama ditu, kemari.

Nangkan nya ku iya, penanggul pengerai runding ti nyadi ba sida anak mit suah dipandang nyadi penanggul ba emosi enggau ulah.

“Lalu nitihka statistik, penanggul pengerai runding ba raban anak mit enggau nembiak dijangka manggai 12.1 peratus.

“Penyampau tu sama enggau siku ari sepuluh iku anak mit tauka nembiak ti ngembuan penanggul pengerai runding, lalu kitai meda penyampau tu majak nambah ninting taun,” ku iya.

Dzulkefly mega madah ninting taun, bisi 800,000 iku orang ditemu munuh diri di selampur dunya.

“Tu nyadika pengawa munuh diri tu kebuah kedua pemadu tinggi ba selampur dunya ngagai sida ke berumur entara 15 ngagai 29 taun,” ku iya nerang.

Nya alai ku iya lebuh dirandau, Stop Stigma Run 2019 tu siti pekara ti beguna laban kitai deka nagang pengawa stigma dalam komuniti kelebih agi ngambika sida ti ngembun penanggul pengerai runding tu lantang lebuh ngulihka bantu.

“Sida deka lemoung agi bekunsi penanggul sida kelebih agi nengah bantu ari pakar psikologi, pakar psikiatri enggau bala kaban ti deka mendingka penanggul ditapi sida.

“Taja nadai pengawa belandai dipejalaika seharitu (kemari) tang nya semua penyereta bela begulai dalam mandang ngagai mensia mayuh guna muai stigma ngagai sida ti bisi penanggul pengerai runding,” ku iya nerang ngagai pemberita.

Kelimph ari nya ku Dzulkefly, penanggul pengerai runding tu ukai semina dikaitka enggau penanggul baka neurosis, psikosis enggau penyakit ke bukai.

Tang tu mega nyengkaum penanggul tusah ati, stress sereta ke bukai lalu tiap komuniti bisi penau ngembuan penanggul nya.

Urung 1,000 penyereta datai ngeranchakka pengawa nya taja nadai pengawa belanda dipejalai beduduk ari Tikas Pengamah Angin (IPU) ti manggai 232 naka pukul 7 pagi.

Bela datai ba pengawa nya Menteri Pengawa Berumah enggau Kaunsil Kandang Menua Datuk Prof Sim Kui Hian, Kaban Parlimen Bandar Kuching Dr Kelvin Yii Lee Wuen, Direktor Opis Pengerai Nengeri Sarawak Dr Jamilah Hashim, Direktor Hospital Umum Sarawak (HUS) Dr Chin Zin Hing sereta Ketuai Opis Psikiatri enggau Pengerai Mental HUS ti menga nyadi Penyanding Penemu Stop Stigma Run 2019 Dr Selvasingam Ratnasingam.