KOTA SAMARAHAN: Kaunsil Mengeri Kota Samarahan (MPKS) chakah mutarka penanggul uras ba sitak nya dikena nyendia servis pemadu manah ngagai rayat dia.
Chairman MPKS, Datuk Peter Minos madah, kaunsil deka berani agi bejalaika pengawa matau ngumpul uras ngambi kunteriktor bejalaika pengawa sida tiga kali seminggu ba mengeri enggau dua kali seminggu ba genturung pendiau.
“MPKS deka betatika chara ngitar baru uras, nyangka kitai patut ngena chara moden dikena ngintu pengerai mensia mayuh enggau rampa menua.
“Kami deka chakah bejalaika inisiatif tu laban kitai enda patut bemain enggau pengerai mensia mayuh sereta tunga kuing rayat enggau rampa menua dudi hari,” ku iya rambau Program Angkat Sumpah Kaban MPKS, ditu tadi.
Program nya dikemataka Sapit Premier ti mega Menteri Pengerai Mensia Mayuh, Pengawa Berumah enggau Perintah Lokal, Datuk Seri Dr Sim Kui Hian.
Peter mujur dipadu baru nyadi Chairman MPKS pengudah gawa ngetuai ke kaunsil nya ba pengelama tujuh taun.
Bela ngangkat sumpah nyadi Sapit Chairman MPKS iya nya Abdul Muttalib Julaihi enggau 30 kaban kaunsil ti bukai.
