Penanyi lagu Takah Tiga Hari, Pamelia David landik murih apai iya

TAJA baru tiga bulan dalam Youtube Twin Tone Production, lagu Takah Tiga Hari udah dipeda lebih 1.6 juta.
Leka lagu Takah Tiga Hari tu ditengkebang Wandie Ibrahim, pengatur muzik enggau tiun Cami Tan sereta videographer iya nya Allen Nyuntai enggau Las.
Ba sukut Ruai Pemerindang minggu tu kitai deka bekelala sereta nemu berita pemadu baru ari penanyi ti nyadaka lagu Takah Tiga Hari iya nya Pamelia David.
Lebuh dirandau Suara Sarawak, Pamelia madah diri anak tuai ari empat iku diri menyadi ke alai menyadi lumur dua nangkan iya lelaki lalu dua iku agi lumur tiga enggau empat bela indu.
Ku Pamelia, apai iya David Till mega siku ari penanyi lama lalu kala ngerikod lagu.

RINDU MERINDANG… Gambar Pamelia lebuh merindang mensia mayuh ba sebengkah pemerindang di menua tu.

LAGU TEBILANG
“Apai aku siku ari penanyi veteran kitai Iban lalu entara lagu ti kala dirikod, iya nya lagu Nuan Semina Beduan,Ka Idup Sekunsi Diberi Pemenchi, Pengerindu Tetap Meruan enggau ke bukai.
Pamelia madahka bisi tiga buah lagu mujur ngangkatka nama iya dalam industri muzik kitai Iban ba menua tu.
Tu nyengkaum lagu dalam album keterubah iya nya Benih Pengerindu enggau Aya Pulai Belelang sereta lagu dalam album kedua iya nya lagu Takah Tiga Hari.
Iya mega minta semua bala peminat terus nyukung sereta mendingka lagu Takah Tiga Hari dalam Youtube Twin Tone Production.
LANDIK BELAGU… Pamelia rinduka pengawa belagu kenyau ari umur 12 taun.

ALBUM PAMELIA
Terang Pamelia, album keterubah iya dikeluar di baruh perabung Kaban Music Production (KMP) iya nya lagu Benih Pengerindu sereta lagu nya chukup tebilang nyentuk diatu.
Iya madahka lagu nya ditengkebang komposer Desmond GP serta lagu berentak joget iya nya Aya Pulai Belelang ditengkebang Robert Bell Sebuyau.
Ke penerang semua, lagu Benih Pengerindu udah dipeda lebih 100,000 ba Youtube Kaban Music Production seraya lagu Aya Pulai Belelang udah dipeda lebih 46,000.
“Apai aku empu mega suah nengkebang lagu aku sereta bala komposer bukai.
“Album kedua aku iya nya Takah Tiga tu ditengkebang Wandie Ibrahim ke udah dikeluar ba Youtube Twin Tone Production kena 27 November 2020,” terang Pamelia.
Iya madahka lagu bukai dalam Album Takah Tiga Hari tu apin ulih dikeluar ba Youtube laban agi bisi penanggul.
SEMAMPAI NYUKUNG… Apai Pamelia (tengah) enggau Allen entara orang kuat ti udah ngangkatka nama Pamelia David ba dunya pemerindang.

BERITA BARU
Ba taun baru tu, Pamelia bisi ngadu pengawa baru kelimpah ari merindang laban ke diatu, sida enda ulih merindang ketegal pengerekai Covid-19.
Pamelia bisi muka kedai penganta dikumbai A3D BEAUTY SALOON di Kuching.
Ku iya, ba salon nya mensia mayuh kelebih agi raban indu ulih ngaduka ‘extension eyelashes, manicure and pedicure, spa, facial’ enggau ke bukai.
“Barang sapa ti deka nganta, tau ngelawa kedai aku laban bisi bemacham servis bisi disedia ungkup kita.
“Kita tau whatsapp nuju A3D BEAUTY SALOON ba lumur 0198935724,” ku Pamelia seraya madahka iya diatu chukup mayuh pengawa dikereja.
BAJIK… Pamelia David

LANDIK BELAGU
“Pengudah suah mendingka apai aku belagu sereta merindang bala mayuh, aku pan nemu belagu laban teleba enggau suah ninga apai aku belagu lebuh bisi pengerami sereta kala ngeluarka lagu.
“Nya kebuah aku nguji belagu seraya nampung pengelandik apai aku empu dalam industri muzik tu.
“Terima kasih ngagai apai aku empu laban udah ngembing sereta ngiri penemu pasal pengawa merindang ba menua tu.
“Berasai chukup gaga laban pejalai aku ba dunya pemerindang tu muntang laban diembing apai aku empu sereta bala bukai ke ngembuan mayuh peneleba dalam industri muzik tu.
“Pia mega, aku berasai gaga enggau lantang ati laban semua lagu disadaka aku tu diterima bala mayuh kelebih agi bala peminat,” ku peranak asal Rumah Rose, Entulang Lalang, Sri Aman nya.
Nambahka nya, sebedau nyadi penanyi tebilang ba menua tu, Pamelia endang suah nyereta pekit belagu kenyau ari umur 12 taun.
Ku Pamelia, iya kala bulih champion ba pekit belagu diatur ba Sekula Primari (SK) Melugu ba Sri Aman beserimbai enggau Ambang Merdeka.
Udah nya, iya mega kala bulih lumur dua rambau pekit belagu di Sri Aman ngarika BSN sereta bulih lumur dua baru ngarika BSN bepekit di Dewan Masyarakat Serian.
Pengujung iya, Pamelia nyereta Pekit Belagu Finalist Bintang Kaban Music Production (KMP) 2016.
TELEBA MERINDANG
“Aku berengkah ngebung dalam industri muzik kitai Iban tu dalam taun 2018 nyentuk diatu.
“Mayuh kenang manis enggau pait ngajar aku ngambi terus ngangkatka diri dalam industri muzik tu.
“Tang aku berasai gaga laban nerima mayuh sukung sekalika ari produser, diri sebilik kelebih agi apai aku empu, bala kaban enggau peminat.
“Pia mega, apai aku empu udah mayuh nulung, ngembing enggau ngajar aku dalam industri muzik, enti nadai ke lama, nadai mega ke baru,” ku Pamelia tuchum gaga.
Ku Pamelia, mayuh kenang manis sekumbang merindang mensia mayuh ba menua tu baka rindu belagu ba endur ke jauh merindang bala peminat.
Iya mega berasai rindu lebuh sida sebilik empu suah nganjung iya nurun belagu merindang bala peminat ba sebengkah endur baka Funfair enggau ke bukai.
Terang Pamelia, iya berasai rindu laban sida sebilik semampai nyukung pejalai dalam industri muzik tu ari keterubah nyentuk diatu.
SUKUNG BALA PEMINAT
“Terima kasih nuju semua ti udah nyukung aku ba dunya pemerindang tu kelebih agi kami sebilik, produser Allen Nyuntai, videographer Louis enggau bini iya, Rolana Gilbert sereta bala bukai.
“Sukung kita tu beguna amat ngambi aku ransing agi ngangkatka diri dalam dunya pemerindang sebaka enggau penanyi bukai.
“Pia mega, terima kasih ngagai bala peminat ke enda leju sereta seruran nyukung semua lagu aku kelebih agi tiga buah lagu aku ti tebilang nya.
“Sukung kita tu deka meransang kami sebuat ngeluarka mayuh agi lagu bemacham tiun ungkup kita.
“Nya alai, anang enda ingat like, share enggau subcribe channel Twin Tone Production ba Youtube,” terang Pamelia.
Ba Youtube nya, mensia mayuh ulih meda mayuh agi video lagu dikerindu kita, ukai semina lagu Pamelia tang mayuh agi lagu disadaka penanyi bukai.
Berebak enggau nya, ngagai bala penanyi bukai, arapka semua kitai besabar enggau penguji ketegal Covid-19 laban kitai enda ulih merindang baka selama.
Nya alai, Pamelia ngarapka igi penyakit Covid-19 tu ulih pukas enggau lengkas ngambi kitai ulih ngereja pengawa enggau merindang baka selama.