BEKENU: Panjung ‘Daulat Tuanku’nyarih didinga ba Pantai Bungai beserimbai pengawa ngambat penatai Yang di-Pertuan Agong Al-Sultan Abdullah Ri’ayatuddin Al-Mustafa Billah Shah enggau Raja Permaisuri Agong Tunku Azizah Aminah Maimunah Iskandariah ba Kembara Kenali Borneo ditu, sehari tu.
Penatai Yang di-Pertuan Agong enggau Raja Permaisuri Agong, pemangku Raja Pahang, Tengku Hassanal Ibrahim Alam Shah Al-Sultan Abdullah Ri’ayatuddin Al-Mustafa Billah Shah, Tengku Panglima Raja Kolonel Tengku Amir Nasser Ibrahim Shah sereta raban sida urung pukul 12.30 tengah hari diambat ngena tanda main asal etnik Kedayan.
Raban nya bela diambat Menteri Pengangkut Sarawak, Datuk Seri Lee Kim Shin, Sapit Menteri Pengerai, Lukanisman Awang Sauni, Sapit Menteri Nembiak, Lumba enggau Pemansang Orang Dagang, Dr Ripin Lamat sereta Sapit Menteri Pemansang Indu, Nembiak Mit enggau Pengelantang Komuniti, Datuk Rosey Yunus.
Al-Sultan Abdullah diberi basa bejadi pengawa nyain plak sebedau sepasang diraja nya sereta bala anak iya merarau seraya diperindang ngena tanda adai-adai enggau pengawa bemukun.
Udah nya, sepasang diraja nya ngabas taba pengerami rayat enggau bansa kraf jari, ngemataka lumba rayat, sereta ngaul rayat.
Dipelaba urung 5,000 peranak dia enda muai peluang ngulu roadshow nya ngambi ulih betunga mua enggau sepasang diraja nya.
Pantai Bungai nyadi palan kepenudi ditapatka sepasang diraja enggau raban sida rambau roadshow ba Pelilih Miri sebedau nerus pejalai ngagai Pelilih Bintulu lalu raban nya mupuk ari Miri urung pukul 1.15 lemai.
