KUCHING: Penyarih auh panjung bala ke datai ngambat penatai jaguh tinju menua, Daeloniel McDelon Bong ba Padang Bilun Entarabansa Kuching (KIA) malam kemari ngasuh bulu pegu nyeregu.
Penatai iya disambut ngena chukup basa enda nyalah baka orang ti nyambut pemulai bujang berani ari ngayau ngalahka rumah munsuh kelia, pengudah champion ba Kategori 57 Kilogram (kg) Pekit Tinju Profesional Pakistan.
Mc Delon bejuluk Kilat Boy gaga bendar ati lebuh meda 19 iku kaban Gempung Orang Asal Sarawak ti betuaika pemungkal gempung nya, Peter John Jaban sama bisi enggau bala bukai ngambat penatai iya.
“Nadai ngadang sekali aku bala bangat ngemayuh nya datai ngambat penatai aku ba padang bilun malam nya. Chukup gaga enggau gagit ati aku meda bala sida ke bisi datai.
“Tambah mega nyau berauh munyi panjung sida, ni enda ati gagit sereta ransing endar ninga. Terima kasih ngagai semua kita kelebih agi Apai Peter John enggau semua ke datai.
“Nadai jaku ulih kena aku niu pengaga ati din meda sukung semua kita. Aku nadai nyangka ngemayuh nya orang kemari, tang amat berasai temegah ati,” ku iya lebuh dirandau Suara Sarawak, tadi.
Bala bukai ti sama datai iya nya dua jauh gumpal isi Sarawak, Buda Anchah enggau Philomena Dexclyn Siar bekenaka ngepan asal bansa Bidayuh sereta ikon tinju menua, Mejar Sapok Biki.
Kelimpah ari nya, Presiden Serakup Tinju Negeri Sarawak (SABA), Dato Rahman Lariwoo sereta bala exco serakup, bala jurulatih enggau sida Mc Delon sebilik sama datai ngambat penatai iya enggau penuh pengaga.
“Aku chukup gaga lalu ngarapka tu nyadi peransang enggau motivasyen ngagai bala nembiak bukai.
“Pia mega aku ngarapka nembiak bukai enggau bala junior ulih nitihka singkang tauka jalai ti udah dirandang jaguh tinju sebedau tu, nempa rikod dunya lalu mai nama Sarawak enggau Malaysia gah ba mata dunya,” ku iya mantaika pengandal diri.
Apin chukup endur belelak ku Mc Delon, dia iya udah nurun belatih laban kena 19 June tu enggau orang bepekit tinju di menua Perlis.
“Lemai lagi udah berengkah belatih baru laban 19 June ila nurun bebukut baru ke Perlis kin. Taja agi madai isi bai mindah tang semua nya nyau enda berasai laban bai ati udah ransing bendar meda sukung sida demalam.
“Sampika pemujur aku lalu arapka semua kitai sama nyaga pengelikun enggau pengerai diri empu,” ku iya.
Mc Delon ngemegahka nama Malaysia kelebih agi Sarawak lebuh menang enggau tumbuh Tecknikal Knock Out (TKO) ngalahka jaguh tinju ari Pakistan, Sikender Abbasi ba pekit diatur ba Stadium Lalak Jan kena Hari Enam tu tadi.
Penyulut Kilat Boy nya mega nerima puji ari Premier Sarawak, Datuk Patinggi Tan Sri Abang Johari Tun Openg enggau bala Menteri ari Sarawak nyengkaum Menteri Dagang Dalam Menua enggau Pekara Penguna, Datuk Seri Alexander Nanta Linggi.
