Penatai Kepala Menteri ngerichah TBC di Miri

MIRI: Pengerami Taun Baru China ditu richah dirami enggau penatai Kepala Menteri (KM) Datuk Patinggi Abang Johari Tun Openg ti datai ngabang ngagai mayuh rumah ditu ensanus berengkah ari pagi dataika lemai.

Penatai Abang Johari enggau bini iya, Datuk Amar Juma’ani Tuanku Bujang disempulang bala bukai diambat enggau tanda singa ditangkan enggau pengawa ngaul pemakai dikumbai ‘Yee Sang’, pengawa nyirap kek enggau dinah mayuh bansa pemakai Taun Baru China ti disediaka tuai rumah nya empu.

Kepala Menteri enggau bini iya disempulang Sapit Kepala Menteri, Datuk Amar Awang Tengah Ali Hasan enggau Menteri Dagang Temuai, Seni enggau Main Asal Sarawak enggau Menteri Nembiak enggau Lumba, Datuk Abdul Karim Rahman Hamzah sereta Menteri Kaunsil Kandang Menua enggau Pengawa Berumah Sarawak, Datuk Dr Sim Kui Hian.

Pia mega, pengawa ngabang tu disempulang Menteri Muda Kaunsil Kandang Menua Datuk Dr Penguang Manggil enggau Menteri ba Opis Kepala Menteri (Undang-Undang, Kaul Perintah Sarawak enggau Perintah Besai sereta Pengawa Matau Projek), Datuk Sharifah Hasidah Sayeed Aman Ghazali.

Rumah keterubah endur sida ngabang iya nya rumah Menteri Perengka Pengangkut Datuk Lee Kim Shin di Tanjong Lobang kena pukul 11 pagi lalu ditangkan ngagai rumah Menteri Muda Dagang Temuai, Seni enggau Main Asal, Datuk Sebastian Ting di Jalai Bunga Tanjung udah nya ngagai rumah Pemungkal Gerup Samling Tan Sri Dr Yaw Teck Seng di Marina Lagoon.

Muak ke lemai, sida ngabang ngagai rumah Tan Sri Ling Chong Ho ba Jalai Luak Bay Tanjung Lobang, rumah Temenggong Yong Vui Seng di Jalai Ping, Ming Sing Garden 2 enggau rumah Ng Sza Liang di Jalai Tudan, Phase 6.

Suara Sarawak