KUCHING: Sarawak dipelabaka deka nerima mayuh agi penatai pemisi ari Chukai Jual Nengeri (SST) ba atas produk petroleum taun tu.
Premier Sarawak Datuk Patinggi Tan Sri Abang Johari Tun Openg madahka pekara nya bekau ari rega minyak dunya ti niki jam diatu.
“Sarawak ngembuan asil ti mayuh pengudah kitai bejalaika SST ngagai produk minyak enggau gis.
“Semina dalam timpuh tiga taun kitai udah mujur ngumpul RM8.5 bilion ari produk petroleum di nengeri tu, ke alai aku ngarapka asil chukai digumpul taun tu terus nambah empas ari rega minyak enggau gis niki,” ku iya.
Abang Johari bejaku munyi nya rambau bejadika Pengerami Makai Lemai Gawai Dayak Renggat Nengeri Sarawak di Palan Aum Borneo Kuching (BCCK), enasana.
Ku iya, rayat mesti seruran besampi awakka nengeri tu likun kelebih agi bekaul isu belanja lalu iya madahka engka deka bisi ‘Gawai’ baru ujung taun tu ila.
Tandu iya, pekara nya nyadi kelai ngagai kumpul chukai SST laban nya sebaka enggau pengerami Hari Gawai ti mai reti beterima kasih ngagai petara laban asil bumai ti ngelumpa.
“Udah kitai semua gawa bebendar ‘bumai’, asil iya ulih diasaika lalu konsep tu amat dampih ngagai aku ngambika rayat Sarawak deka bulih asil ari semua utai ti digiga kitai ungkup pemaik kitai semua,” ku iya.
