KUCHING: Penatai temuai menua luar ke Sarawak nambah ke alai bisi 328,009 temuai ke Sarawak ba timpuh Januari ngagai Februari 2023 dibanding 6,604 temuai ba timpuh sebaka taun nyin tadi.
Menteri Dagang Temuai, Industri Kreatif enggau Seni Pemerindang Sarawak, Datuk Sri Abdul Karim Rahman Hamzah madah, penyampau nya dirikodka nambah 4866.82 peratus.
“Ari penyampau nya, tebal agi temuai tu ari Brunei berindik ari menua nya muka pintu adan menua sida berengkah taun nyin tadi,” ku iya.
Karim mansutka jaku nya ba aum pemberita Pengawa Numbuhka Pavilion Keterubah Sarawak ba Imex Frankfurt 2023, Jerman, ditu kemari.
Bekaul penatai temuai Eropah ke Sarawak, Karim madah, bisi 600,433 iku temuai ari menua Eropah kitu ungkup timpuh Januari enggau Februari 2023.
Ari penyampau nya ku iya, bisi 300,000 penatai temuai Eropah dirikodka ninting bulan.
“Tagit opis menteri taun tu iya nya tiga juta penatai temuai Eropah.
“Enti penyampau nya 300,000 pukul rata ninting bulan, reti iya pengelama 10 bulan ila, kitai ulih nyapai tiga juta temuai.
“Aku pechaya, kitai ulih nyapai lebih ari tiga juta tauka nyentuk empat juta temuai laban bemacham pengerami deka diatur berengkah bulan Julai nyentuk September taun tu.
“Tambah mega, aku enda nemu sekali ke hotel ba Kuching ulih nangkup penatai temuai ke Sarawak kelebih agi bulan September tu,” terang iya.
