Pendingka peminta Sarawak

KUCHING: Presiden Parti Sa’ati Rayat Sarawak (SUPP) Datuk Seri Dr Sim Kui Hian madah sukung ke diberi ngagai parti-parti politik di Semenanjung deka mandangka ubah enggau juluk ke nyata parti dalam numbuhka perintah baru.

Ku iya, kena Hari Minggu ke udah nengah sukung mandnagka pekara lebih ngagai pemaik menua, tang berubah baru hari situ lalu lebih ngagai pemerat parti lalu ngujungka nyentuk sehari tu dipeda lebih ngagai ngemeratka diri empu.

“Dedin (Semenanjung) nadai orang deka nyaga hak Sarawak, sida ‘meda aja’ kitai ditu.

“Enggau kitai Sarawak ke bisi 18 iku kaban Parlimen ulih ngubah ngenap pemutus, lalu pemutus ke digaga nya patut nyata lalu enti ulih kitai deka sida di Putrajaya datai ke Sarawak mendingka peminta kitai,” ku iya rambau Pengerami Makai Lemai “Padungan Night” di Crown Square kena Hari Lima tu tadi.

Iya ke mega Menteri Kaunsil Kandang Menua enggau Pengawa Berumah mega ngelalau semua kaban parti terus beserakup enggau bebendar ngetanka hak enggau pemaik Sarawak.

“DAP dibaruh Pakatan Harapan diatu di Sarawak nyata agi bemimpi, lalu nama ke pemadu beguna patut diberi iya nya sukung ngagai parti dalam ngetan hak anak Sarawak.

“Ari pepenguntung menua terus ngubah pekara ti nguntungka diri empy lalu nadai ingatka pemaik Sarawak nyadi semua piak patut sedarka pekara tu,” ku iya.

Ngelansa pasal GPS, sekalika nyukung parti Bersatu ke diiring Tan Sri Muhyiddin Yassin tauka Parti Keadilan Rakyat (PKR) diiring Presden parti Datuk Seri Anwar Ibrahim, iya madah aum bedau digaga bekaul enggau pekara nya.

“Kitai nganti pemutus Kepala Menteri ba sentang tu, kitai bedau baum pasal tu,” ku iya.

Suara Sarawak