KUCHING: Gabungan Parti Sarawak (GPS) patut terus ngiring nengeri tu awakka pemansang ulih dirumban, ku Tan Sri Dr James Jemut Masing.
Sapit Kepala Menteri madah, penegap politik di nengeri tu patut terus dijaga dikena nentuka pemansang rama enggau ekonomi Sarawak bejalai enggau manah.
“Pengelama 22 bulan pegai Perintah PH patut nyadika malin ngagai semua rayat Malaysia. Anang ngubah ketegal semina deka ngubah,’ ku Masing nengah pesan taun baru iya sehari tu.
Ku iya, pandemik Covid-19 udah ngubah semua utai, menua pemadu kuat ba dunya mega alah laban pandemik lalu ngujungka ekonomi enggau pengidup sida berubah.
Tandu Masing, Malaysia enggau Sarawak mega enda ulih ngelari diri ari kena pangka penyakit Covid-19.
“Perintah Sarawak dibaruh iring Datuk Patinggi Abang Johari Tun Openg udah bejalaika pengawa enggau naka pemanah meri bantu dikena nentuka rayat Sarawak ti kena pangka Covid-19,”ku iya.
Iya madah, taun 2021 endang taun chara baru laban kitai nadai agi idup baka dulu suba.
“Pendiau mensia mayuh deka begulai enggau pangan diri mega ditatak. Kelimpah ari nya kaul entara mensia mayuh mega nyau enda baka suba.
“Takah rama ungkup begempuru mega ditatak enda ulih mayuh. Pengidup mensia ke dititih kitai bekurun lama diatu udah berubah,” ku iya.
Berebak enggau nya, Masing nutup pesan taun baru enggau jaku Selamat Taun Baru 2021 ngagai semua rayat Sarawak lalu ngarapka seruran diberekat Tuhan.
