Penembu Jematan Nanga Lassa jemah mutar penanggul bekal ai

DARO: Penembu Jematan Nanga Lassa ba taun 2023 ila deka meri pangka ke manah ngagai aktiviti sosio ekonomi peranak besemak kelimpah mutar penangggul bekal ai dianjung ngagai sitak Daro enggau ke bukai.

Kepala Menteri Datuk Abang Johari Tun Openg madah nengah projek jematan be beungkus lebih RM600 nya iya deka meri pangka besai ngagai pemansang ekonomi nyengkaum pengawa betanam betupi, berikan enggau ke pengawa bukai.

“Udah tentu jematan tu meri pangka ke chukup besai ngagai sukut pemansang ba sitak tu laban besambungka Daro enggau Pulau Bruit, Pulau Bruit kitai bela nemu patut dikemansang sebaka enggau sitak bukai.

“Ba ujung sepiak Pulau Bruit tu kitai mega deka ngaga Jematan Paloh ti besambungka Pulau Bruit ke Tanjung Manis,” ku iya madah rambau aum pemberita pengudah Pengawa Nasih Tanah Jematan Nanga Lassa kemari.

Ku iya aktiviti ngaga jematan nya ngembuan tanggungpengawa ke besai besambung menua pesisir nyadi menyana umba jematan tu nyadi jematan lumur dua pemadi panjai di Sarawak nangkan Jematan Batang Lupar.

“Jalai pesisir tu endang penyambung besai ba sitak Rejang nyentuk ke Mukah, Daro, enggau menua ke besemak.

“Sitak-sitak tu mega endang penyambung pemansang di menua pesisir laban ditu ngembuan penau ari sukut industri betanam betupi, industri halal hub, pengawa berikan kelimpah ari aktiviti ngaga kapak ke mungkur sitak Pengkalan Tanjung Manis, ” ku iya.

Ba pemansang ke sama ku iya nengah jematan nya ulih endur nyambung pejalai ai paip ngagai sitak bukai ungkup timpuh lima taun dekda datai ngagai sitak Tanjung Manis, Pulau Bruit enggau Daro.

“Ambika banding ba Daro ari Sibu pun penatai ai ulih disambung ari jalai darat enti nengah jematan tu, kitai enda lama agi nguna perengka paip dalam laut laban dipeda lebih mar lalu bisi penanggul ngagai paip laban ai suah pasang.

“Nyema nengah jematan tu mega, iya ngemuntang pejalai kitai mai ai lalu kitai enda ibuh agi ngena jalai sungai tauka tasik,” ku iya.