SERIAN: Sekula Primari (SK) Triang ditu udah tembu digaga ngena agih belanja RM16.2 juta ti deka meri penguntung ngagai semilan buah genturung menua ke besemak enggau sekula nya.

Entara semilan buah genturung menua tu iya nya Kampung Tong Nibong, Kampung Empessa, Kampung Kranji Atas, Kampung Kranji Baroh, Kampung Sungai Linsat, Kampung Kenyalang, Kampung Sungai Buru, Kampung Sungai Paoh enggau Kampung Sungai Aping.

Pengawa bejadika sekula tu udah dikemujurka Duta Khas Menteri Besai ngagai Asia Timur (Jipun, Republik Korea enggau Taiwan) ti mega Kaban Parlimen Serian Datuk Seri Richard Riot Jaem kilah ensanus.

Ku Riot, SK Triang tu udah tembu digaga kena 21 September 2017 lalu udah berengkah bejalaika operasyen kenyau ari 2 Januari 2018.

“Sekula tu chukup manah taja digaga ba menua pesisir tang enggau penyabar sereta kerejasama ari rayat ditu kenyau ari 15 taun tu ke udah ngujungka sekula tu tembu digaga,” ku jaku Riot lebuh bejadika sekula tu.

Ba pekara ke sama mega, iya ngenataika jaku puji ngagai Kepala Pengajar sekula nya Jani Limin sereta bala pengajar enggau apai indai nembiak nengah Gerempung Apai Indai enggau Pengajar (PIBG) ti semampai besabar begigaka jalai dikena ngemansangka sekula tu.

“Aku muji pengawa ti udah digaga bala PIBG ba SK Triang tu ti udah chukup sabar lalu ngiga mayuh jalai dikena mutarka nama pengurang ti bisi ba sekula tu suba.

“Aku mega ngarapka semua kitai mesti nyaga enggau manah sekula tu ti mega dianggap aku nyadi sebuah Kampus Mit di menua pesisir,” ku tandu Riot.

SK Triang tu ba dalam sitak Tong Nibong ti mega dibaruh Sitak Kunsil Nengeri (Dun) Kedup lalu dijangka deka meri pengelantang ngagai raban nembiak besekula ti besemak genturung dia.

Sama datai ba pengawa bejadika sekula tu iya nya Sapit Pegawai Pelajar Pelilih Menua Serian Unit Pengaga Langgur ti mega bejalaika tangunggpengawa Pegawai Pelajar Pelilih Menua (PPD) Patrick Mandon, Kepala Pengajar SK Triang Jani Limin, Prinsipal SMK Tebakang enggau Chairman PIBG SK Triang Martin Munan.