Penemu Apai Indai deka diperunding – Manyin

Sains Matematik ngena Jaku English 2020

KUCHING: Berengkah ari taun 2020, Subjek Sains enggau Matematik deka diajar dalam Jaku English ba 1,460 sekula primari ungkup nembiak Primari Satu.

Menteri Pelajar, Sains enggau Pansik Teknologi Datuk Sri Michael Manyin Jawong madah, pekara tu nerima timbal manah ari semua ketuai opis bekaul.

“Kitai bisi 1,265 sekula primari lalu 220 ari penyampau nya Sekula Primari Bansa China (SJKC).

“Kami udah ngaga pemutus bejalaika atur Subjek Sains enggau Matematik deka diajar ngena Jaku English ti ngaul 1,460 sekula primari selampur Sarawak,” ku iya nerang.

MANSUT PENERANG… Datuk Sri Michael Manyin Jawong (tengah), Azhar Ahmad (kanan) enggau Datuk William Peter Nyigor (kiba) rambau aum pengarang berita kemari.

Michael mansutka penerang nya rambau aum pengarang berita di Begunan Baitulmakmur ditu, kemari.

Kelimpah ari nya ku Manyin, pekara tu mega deka mendingka timbal ari apai indai sereta beratika penemu sida.

“Kitai deka mendingka penemu apai indai pasal pekara tu, nya kebuah aku dulu mantaika pekara tu diatu.

“Taja pia, aku pechaya tebal agi apai indai deka setuju laban pekara tu meri pemaik ngagai anak sida dudi ari,” ku iya.

Michael mega madah, ngajar nembiak ngena Jaku English tu mayuh pengelebih kelebih agi dikena nyikap diri napi pemar maya ngiga kereja jemah.

“Diatu sektor peribit endang ngiga nembiak ti landik bejaku English nangkup peminta makit kereja sereta ngisi pengawa puang.

“Nya alai nentuka sida tetangkupka peminta, bala nembiak enda tau enda diseridi enggau dipatih ari renggat tumu, matih diri belajar ngena Jaku English.

“Penguntung mega pulaika sida empu sereta ulih meransang sida ransing agi belajar enggau ngiri penemu,” ku iya madah nyemetak.

Taja pia ku Michael, ba Ujian Penilaian Sekolah Rendah (UPSR), peresa meruan dipejalai ngena dua batang jaku, Jaku Melayu enggau Jaku English.

Sama bisi datai ba aum pengarang berita Direktor Pelajar Sarawak Azhar Ahmad enggau Sekretari Mendam Opis Menteri Pelajar, Sains enggau Pansik Teknologi Sarawak Datuk William Peter Nyigor.