Penemu ari Kolej Komuniti malin

Themotty ngerandang dunya dagang

SIBU: Penemu diiri lebuh ngulu kus pengelama 16 bulan di kolej komuniti sebedau pinchin soldadu langit dikena Themotty Jagak, 45 taun, ngepunka dagang nuchi kerita di Kemuyang ditu.

“Lebuh ngambi kus suba, kami bisi diajar pasal pengawa enggau chara bedagang, ngaduka akaun enggau mayuh pelajar bukai.

“Runding lalu tekuing deka bedagang baka orang bukai sereta aku meransang diri ngepunka singkang ba pengawa tu,” ku Themotty ngelansa kenang iya.

Ku peranak Kampung Krangan Tekalong Balai Ringin, ari dagang tu mega iya ulih nyaup bala nembiak ti nadai kereja ngiga belanja enggau peneleba gawa kelimpah nyendiaka servis ti meruan agi.

Sida tu ulih belajar mayuh penemu baru enggau pengelandik kelebih agi ngaul servis nuchi kerita sereta kaul enggau penguna ti datai ngulihka servis ditu, ku iya.

Ngena chap dagang Tom TJ Trading, iya mega bisi nyendiaka servis bukai baka ngilatka kerita, nyual kereban entukar, bejualka pemakai enggau ai irup ba kedai iya nya nentuka sida ke datai kia berasai lantang.

“Aku diatu disaup tujuh iku pekereja datai ari bala nembiak lalu semua sida endang diajar enggau dilatih chara ti patut enggau betul maya gawa.

“Taja baru manggai lima bulan ba pengawa ti dipun dalam bulan Oktober 2018, tang bisi amat pemujur sepi aku, ke alai untung udah mayar gaji enggau belanja bukai lebih ari RM3,000 sebulan,” ku iya.

Themotty mega madahka diri temegah ati pengudah dipilih raban German Technology GM-Tech ari Kuala Lumpur endur nunjukka chara ngilatka kerita di Sibu ditu.

“Tu mega meri peransang ngagai aku nyingkang jauh agi ba dagang baka numbuhka mayuh agi palan servis sereta numbuhka kedai nyual tayar jemah.

“Taja ati gagit amat deka mansang, tang sedar agi mayuh pengelemi enggau pengurang ti patut dikemanah sekalika ari servis disedia, pengawa ngelaku enggau makit kitai bansa agi jauh kurang ari bansa bukai.

“Nya alai aku minta enggau meransang bala kitai bela nyukung dagang bansa diri pulaika pemaik semua,” ku iya madah nyemetak.

Barang sapa begunaka servis nuchi kerita enggau servis bukai tau ngelawa sida di Batu 9, Simpang Kemuyang, betunga enggau Opis Kereja Raya (JKR) Jalai Oya ditu.

Penerang enggau tanya silik tau telefon nuju Themotty empu ba lumur 011-2501 9627 tauka 014-213 1338 tauka nganjung email nuju tomrmaf@gmail.com.

Suara Sarawak