Penemu dikunsi pengajar Roselind narit ati

SITI karang pengajar Kelas Pemulihan di Sekula Primari (SK) Semukoi benama Roselind Jawie narit ati kitai ke macha.
Penemu dalam enggau jaku ajar dikunsi pengajar nya mega udah matak perati penguna sebelah media rama nyengkaum Suara Sarawak empu.
Nyadi utai ke manah baka tu ulih dikemeranka apai indai ba rumah ngambi mantu bala anak sida belajar ba rumah maya Pengawa Belajar enggau Ngajar di Rumah (PdPR) ketegal pandemik covid-19.
MERANSANG ANAK MACHA

NGASUH LELENGGAU… Gambar kenang pengajar Roselind begulai enggau bala nembiak ke diajar iya.

Baka ni chara kitai ngasuh anak jampat nemu macha sereta bisi minat macha.
Bepelasarka peneleba tudah diri ngajar nembiak ke udah manggai 14 taun diatu.
Ku pengajar Roselind, mayuh bala nembiak berengkah ari nadai utai temu lalu udah nya nyau landik macha sereta ulih pas peresa UPSR.
“Tunjukka chunto ngagai anak kitai. Anang semina ngarah iya belajar tang kitai patut sama enggau anak belajar.
“Duduk berimbai sereta nulung iya nyepil ni utai ke patut. Jaku tundi mega nadai salah dibantai, ngambi sama ketawa gaga lalu ati anak lantang lebuh belajar.
“Pia mega enti sema iya salah pen nadai ngawa. Anang lalu nganu tudah laban iya endang agi pabu penemu, agi tubah utai deka dipelajar,” ku iya ngepunka kenang diri.
PERATI MINAT ANAK
ATI GAGIT… Sekeda ari keranjai jari bala nembiak diajar pengajar Roselind.

Pengajar Roselind madah, apai indai patut bisi pengiruh ke pengawa enggau minat bala anak sida.
Ku iya, apai indai mesti ngiga utai diminat bala anak lalu meri peransang ngagai anak belajarka utai diminat sida.
“Ambika banding, enti anak kitai minat kerita. Kitai tau mai tauka ngajar iya nero kerita, nyepil kereban kerita baka roda, tayar enggau ke bukai.
“Tauka kitai ngajar anak lagu Bapa Ku Pulang Dari Kota ke bisi nyebut … bapa ku belikan kerita, kerita kecil warna merah, boleh ku bawa ke sekolah.
“Mudah aja neh, seraya kitai meransang minat anak belajar enggau merindang sida ngambi rindang belajarka penemu baru ti dikerindu,” terang peranak asal Melupa, Saratok.
Nambahka nya ku iya, enti apai indai nemu utai diminat bala anak dia sida senang deka mutarka kuing pejalai pelajar bala anak dudi hari ila.
NARAK DISIPLIN
SIRUKA NEMBIAK… Pengajar Roselind rindu bebalut enggau bala nembiak kelimpah mayau dikesayau iya.

Pekara disiplin nya nyadi pun pemujur genap iku kitai ke belajar ngiri penemu, ku pengajar Roselind.
Ari nya, iya chukup beratka disiplin bala nembiak ke ulih ditarak apai indai tauka sida ke ngibun anak di rumah.
“Gaga taga (jadual) jam belajar ke enda tau enda dititih bala anak. Apai indai mih orang ngemataka disiplin anak sida lebuh di rumah.
“Taga tu tadi enda tau dilanggar, nadai ngira nama dalih bala anak, apai indai mesti terit lalu tau ngeletak ukum ke patut enti sema anak sida sengaja ngelanggar atur tu.
“Kebuah pia laban maya jam tu mih awak anak mesti macha tauka ngaga kereja rumah sida.
“Nya alai apai indai tauka orang ke sebilik ke bukai mesti nitihka atur jam tu ngambi bala anak ngasika jaku enggau taga jam belajar ti udah diletak.
“Jam tu ungkup belajar aja. Nadai bepedaka televisyen, kereban elektronik (gadget) nyengkaum ditagang ari meda Facebook enggau WhatsApp,” ku iya nerang pasal narak disiplin anak bepun di rumah.
BELI KEREBAN BACHA
Kelimpah ari ngandalka kereja rumah diberi bala pengajar, apai indai patut bisi inisiatif meli bup tauka kereban bacha bala anak di rumah.
Taja pia ku pengajar Roselind, kereban bacha ke dibeli nya mega ukai sepeneka ati meli tang patut berundingka umur tauka kelas bala anak.
“Enti anak kitai nya baru masuk tadika tauka kelas pemulihan khas, kereban bacha tau dibeli nya bup sepil jaku.
“Anang ngenyit meli bup ke semua urup chelum enggaika minat anak nyau mantul laban sida enda nemu magi sepil jaku nya tadi.
“Bup ke bisi sepil jaku deka ngasuh sida ransing agi belajar, nguji nyepil enggau nyebut genteran jaku ke disepil nya dataika lanchar.
“Bisi sekeda nembiak rindu agi nyepil sambil belagu lalu suah agi utai ke disebut nya tau lekat ba runding enggau pikir sida,” ku iya madah nyentuk.
Berindik ari nya, apai indai anang enggai ngungkupka belanja bebelika kereban bacha tauka bup ngagai bala anak laban tu puku tauka saham ti deka mansutka asil jemah.
Kira ke kitai beranakka puku dulu ba pelajar bala anak ngambi pengidup sida jauh nyamai enggau menyana ari kitai ke diatu, ku pengajar ke udah ngajar di SK Semukoi 14 taun ke udah.
Pengajar Roselind madahka diri endang ngepunka pengawa nyadi pengajar ba sekula nya kenyau ari taun 2007.
Iya kala ngambi Kus Dalam Kemisi (KDC) Pemulihan Khas lalu dichiri nyadi pengajar tetap dalam taun 2010, ngajar ba sekula ke sama.
BERI JAKU PERANSANG
Bala anak sigi berasai gagit enti nerima jaku puji kelebih agi ari apai indai sida empu.
Jaku puji tu mega ku pengajar Roselind deka nyadika peransang sida nyapai penyulut ba sebarang pengawa dikereja nyengkaum ba pekara pelajar.
“Chunto jaku puji ulih dikena, pandai nuan anak, pintar nuan tuan, landik nuan kumang. Chukup manah mih nya igat, chukup nemban mih nya endu.
“Ooo… nyau deka kena nya anak, sepil baru, enda iya salah lagi deh. Lagi indai tauka apai nyaup nuan. Ukai nya nyemetak salah deh anak tang kurang betul, uji baru au.
“Tu sekeda jaku ajar ke semitan dikena kitai ngajar tauka ngembing bala anak lebuh belajar, anang lalu nemil ke tau ngujungka sida mantul ati.
“Beri jaku sukung, tang anang ngena jaku ke rangkai didinga enggai bala anak jampat putus pengarap deka belajar.
“Leka jaku palui, beli, dadak, tambap enggau ke bukai nya enda tau sesekali dikena ba mua bala anak kitai ke benung mansang besai.
“Bala anak mega nyau deka nunda ulah enggau jaku ke disebut kitai ke tuai, runding ke mai pemuntan,” ku lalau iya.
ULAH BELEBAS
Ukai semina nya aja, apai indai mega anang kelalu renjan jaku nganu bala pengajar dataika didinga bala anak.
Kebuah pia ku pengajar Roselind, ulah baka tu nyadi cheremin bala anak ngagai pengajar sida.
“Ulah baka tu tau ngasuh anak nyau enda bebasaka bala pengajar ke ngiri penemu.
“Ukai bala pengajar ke rugi tang kebendar kitai enggau bala anak. Penemu nyau nadai berekat.
“Ukai ketegal kami ke nyadi pengajar enggai dianu tauka mali dianu, tang peragam bala anak ngagai pengajar bisi kaul rat enggau pengeransing sida belajar.
“Nemu kita utai disebut aku ditu. Nya alai apai indai patut bisi lebas mantaika jaku enggau penemu ngagai bala pengajar laban kitai idup di dunya tu bisi lebas mega.
“Pemujur bala anak datai ari berekat penemu ke diajar bala pengajar,” lalau iya.
ANANG BERUMBAN, SABAR
Apai indai anang tusah ati meda anak orang udah nemu macha, lanchar nyepil enggau landik ngira.
Lantangka ati enggau runding kita lalu tanya bala anak enggau pengajar nama bagi utai ke nanggul.
“Siku-siku mensia bisi penau tauka pengelandik diri empu, pia mega chara sida nangkap penemu, bisi nya lubah lalu sekeda ke bukai lanchat belajar.
“Ari nya kitai patut sabar ngajar anak ke lubah nemu macha tauka lubah ba pelajar laban sida bisi pengelebih enggau pengurang diri empu.
“Ba aku empu, pengingat ke diajar niang apai suba jauh tampak ari pengingat diajar pengajar ba sekula.
“Nyentuk diatu, genap chara niang ngajar endang agi dikeingatka aku, bemain ba pikir enggau runding.
“A tangga lada, Y setik, 8 chermin mata, 7 pengait enggau mayuh ke bukai.
“Tetap mih buah kenang pait manis begulai enggau apai indai ga pemadu manah ba aku empu.
“Nya alai, anang enggai nurai kenang begulai enggau bala anak kenyau ari sida mit laban enti udah besai lalu ngidupka diri jemah, ukai nadai tang awak begulai nyau jarang mih,” ku pengajar Roselind.
BESAUP NGAJAR ANAK
Pekara pemadu beguna, bala anak mesti lepas A – Z, vokal a e i o u e enggau sepil jaku.
Peratika pemansang pelajar bala anak kita kelebih agi diatu PdPR ke begunaka kerejasama apai indai bejalaika pangku pengawa ngemataka ulah bala anak di rumah.
“Kami ke nyadi pengajar kebendar enda entu nyamai asai lebuh nejuka apai indai ngatur PdPR tu tang kati ku enggau, kitai nitihka atur diberi perintah.
“Ati din enggai mih tang pandak jaku. Nya alai meri besai terima kasih ngagai apai indai ke udah kiruh enggau ngelimpangka awak sida nyaup bala anak belajar.
“Bala anak kitai tentu mega ngasaika tu pengingat pemadu manah seumur idup sida, nempa kenang manis taja menua tasah ketegal covid-19.
“Nadai salah beduaka penemu kena kitai ngiga chara pemadu manah lebih agi kitai sama napi penguji besai diatu,” ku pengajar Roselind nyimpul kenang.

Suara Sarawak