Penemu ke gembar tubuh

KANOWIT: Niat semina deka bekunsika penemu sereta nampung tipan jerita sida ke tuai pasal sebengkah utai ke bisi dikembuan raban bansa Iban kelia iya nya pengaruh, penchelap, pemanis, sakang, rajut enggau ke bukai.

Ku Mathew Mudai, penemu enggau penerang dikemisi deka dibedua enggau rebak baru laban tebal agi sida udah nerima segang pemansang dalam pengidup nitihka singkang pemansang dunya sereta pemansang pengidup orang bukai.

Pengaruh

Sekali tu Mathew, peranak asal Kanowit, matak kenang pasal pengaruh, sebansa utai mit ti tau dikena nyaga sereta ninding orang empu ari utai enda manah tauka jai lalu tau ngemai penguntung ngagai orang ke ngena iya.

“Pengawa besimpanka pengaruh tu endang siti ari daya idup kitai bansa Iban ti dikemeran kenyau ari aki ini bepun ari pengarap lama.

LURUS ATI… Mathew ngulu bala mayuh ngirah kesemua pengaruh, penchelap, pemanis enggau sakang seribu guna.

“Pengaruh munyi ti diterang aku ari pun tadi endang dalam mayuh macham tukuh berengkah ari tanduk jelu nyentuk utai ti ulih disimpan dalam puchung tauka butul.

“Pelanduk ti bisi tumbuh tanduk dikearapka kitai tanduk nya tau diambika pengaruh, nyadika ubat penunduk.

“Reti nya orang ngempu pengaruh tu ulih ngasuh orang bukai nunduk ngagai iya sereta nitihka jaku tauka asuh iya ti bempu pengaruh nya,” ku Mathew ngelansa.

Ku iya, raban bansa Iban mega arapka diri kebal lalu bisi sekeda nya ngena ilmu kebal maya nyabung.

Nampung jerita sida ke tuai, manuk bisi ngena ubat kebal deka tan belaban enggau manuk sabung bukai lalu enda mudah telih dirindas taji ti tajam laban ubat kebal tu mih ti ngasuh manuk nya nadai nemu telih tauka bakal.

BEDUA… Ai basu ti udah dikirah ngena batu, taring jelu enggau ke bukai diunsut ba tubuh.

“Sebengkah agi pengaruh ti bisa dikumbai punti enggau pulung. Punti tu suah agi digaga manang lalu seruran agi ditani ba jalai ti dipansa orang ke deka dirachun nya.

“Lebuh orang ke dituju nya mansa tauka nengah jalai nya iya tau kena punti lalu enti semitan tau ngasuh orang tekena nya pinchat, kepi tauka berasai pedis amat ba kaki.

“Baka nya mega pulung digaga manang tauka beliau ti ulih terebai ngagai orang ke dituju lalu pengawa nerebaika pulung nya dikereja beliau dikena nganjung pulung nuju orang deka dibunuh.

“Kenu ku orang, mata iya ke udah kena pulung bebali mansau sereta belai sereta deka ngasaika diri pedis enggau enda nyamai isi.

“Orang ke sakit ketegal pengaruh semina ulih diubat bala dukun, beliau tauka manang ngena pengaruh mega,” ku Mathew nerang.

Berubat Chara Lama

Ku Mathew, ubat moden kemaya hari tu enda semitan sereta enda ulih dikena ngubat sida ti tekena pengaruh orang.

Nya alai agi bisi sekeda raban bansa Iban ke agi arapka penyakit ti baka tu semina ulih diubat ngena chara lama.

“Ketegal nya mih agi bisi raban bansa Iban ti ngemeran enggau niti nali pengarap lama kelebih agi sida ti diau di rumah panjai di menua ulu enggau menua pesisir.

“Bansa Iban mega arapka pengaruh baka rajut ulih nyaga diri empu ari penusah lalu sida ti balat agi bekena sereta besimpanka pengaruh ti baka tu iya nya sida ti gawa nyadi soldadu.

“Taring babi enggau tanduk rusa ti diulih nengah kenyap tauka mimpi, suah agi diberi antu enggau petara, sekalika nyengenda dipeda mata tauka enda.

“Utai baka tu tau bendar dikena nyaga diri ari dikena timbak munsuh laban bisi empelias lalu engkerabun nya ngasuh orang enda ulih meda.

“Maya belaban enggau munsuh bisi mayuh macham pengaruh ti tau dikena nyengkaum batu ratai, daun, pinang enggau libut nya dikena ngeringka diri enggau semengat,” ku iya nerang silik.

Kelimpah ari nya ku iya, duri enggau sumpit dikena lebuh matau munsuh lalu batu kulat dikena ngenakutka munsuh lalu kerai baka kanching dikena nyaga diri empu sereta mali lebu, gamang enggau kebal pesiar nya dikena ngeregau raban munsuh.

Chara Ngulih Pengaruh

Kenu ku tusi orang tuai ku Mathew, bisi tiga chara tauka jalai dikena ngulihka pengaruh.

“Keterubah, pengaruh diambi ba pandung ti diberi petara lebuh sida dikangau ngabang ti suah disebut dalam leka pengap bala lemambang maya nirika gawai.

“Bisi mega pengaruh nya diberi sebayan sekalika sida sebilik tauka sebayan bukai maya sabak ti diberi semengat orang ke udah lesi dibai hari.

“Lalu ketiga nya nengah chara nampuk. Orang ke nampuk tu teulihka pengaruh sida nengah mimpi tauka ari kenyap.

“Sida ke nampuk tu suah agi ba bukit, pendam tauka sebarang endur ti jauh ari mensia mayuh.

“Pengawa nampuk tu mega bisi dikenang dalam leka lagu ‘Biar Bekikis Bulu Betis’ munyi tu; Bukit Sematan, Pulau Sumatera, Gunung Selindung di Kota Jawa, dia alai aku bulih ngasu penemu, puchau lelengau seribu guna,” ku iya ngerintaika chara ngulih pengaruh.

Kenang penuh tau dibacha ba lambar R1, Suara Sarawak – Ruai pagila.