Penemu ngemai pemaik, pengelebih patut disukung

KUCHING: Perambu deka matih pengajar ti ngajar subjek Sains enggau Matematik ngena Jaku English diperati nyadi pekara ti manah.

Pengawa matih tu ukai semina mai pemaik ngagai pengajar, tang mega ngagai bala nembiak belajarka subjek nya.

Suara Sarawak minta penemu sekeda ari mensia mayuh nerima perambu tu enggau manah.

Ku penemu Mohammad Iskandar Norhayat, 25 taun, gawa ba opis perintah, tu langgur penemu chukup manah sereta patut disukung.

“Kebuah pia laban nyauka serap menua ngena jaku tu kelebih agi ba pelajar sekula enggau pekara ekonomi.

Mohammad Iskandar Norhayat

“Nya alai, enti dua bengkah subjek tu (Sains enggau Matematik) diajar ngena Jaku English, nya nadai ngemai penanggul ngagai chara belajar jemah,” ku iya.

Iskandar madah, tu chukup engkeman diajar ngagai bala nembiak ari renggat tumu, iya nya maya sida baru besekula.

“Ngagai bala pengajar ti ngajar subjek tu, nyangka bisi pemar mimit ari sukut matih sida, laban nyangka enda semua ulih dipatih baru.

“Tang enti ari sukut tanggungpengawa enggau pangku pengawa sida, tu endang patut diterima genap pengajar, sekalika sida nerima tauka enda,” ku iya nambah.

Seraya Anderson Wan Schmit, 25 taun, ti kala nyadi pengajar nyilih pengajar ti kemisi panjai madah, iya setujuka langgur penemu enggau pejalai sistem pelajar baru nya.

Anderson Wan Schmit

“Pekara tu mega meri pengelebih ukai semina ngagai bala nembiak, tang mega bala pengajar nya empu.

“Taja bisi perengka guna internet diatu, bala nembiak mengkang napi pemar belajarka Jaku English,” ku iya.

Tu sebagi ari chara dikena sekula nerenak ulah angkunka Jaku English ngagai nembiak berengkah ari terubah sida besekula, ku Anderson nampung.

“Bala pengajar dipatih ngena Jaku English ulih nangkup peminta pengawa landik sereta bepenau ngena batang jaku nya kelimpah ulih nempa modal mensia ti menyana.

“Taja pia, apai indai mega patut nyukung pekara tu lalu ngajar bala anak ba rumah, ukai semina ngarapka sekula aja,” ku iya.

Seraya, siku nembiak politeknik ditu, Carolyn Philip madahka tu pengawa ti deka nambahka pemintar enggau pengelandik bejaku ngena Jaku English, ti mega digelar jaku penemu.

“Jaku English suba kala dikena ngajar subjek Sains enggau Matematik tang diubah baru ngagai Jaku Melayu.

“Enti pekara tu mujur, ari sukung semua, apai indai muntang agi ngajar bala anak sida ba rumah laban mayuh sida diatu, endang belajarka dua bengkah subjek tu ngena Jaku English,” ku iya.

Pia mega ku Carolyn, Jaku English patut diterenak ari umur bik lalu anang suah ngubah sistem pelajar menua nentuka pengawa ke dikereja kitai deka mansutka asil baka dikedeka.

Ba surat berita kemari, sepenyampau 2,657 pengajar dipadahka deka dipatih ngajar Subjek Sains enggau Matematik ngena Jaku English datai ba taun 2020.

Menteri Pelajar, Sains enggau Pansik Teknologi Datuk Sri Michael Manyin Jawong madah, pengawa matih bala pengajar tu deka dirumban opis menteri iya.

Carolyn Philip