SIBU: Penemuai ke chukup besai reti ungkup sitak aku, ku Adun Bukit Assek Chieng Jin Ek bekaul penemuai sambil belajar begulai enggau Premier Sarawak Datuk Patinggi Tan Sri Abang Johari Tun Openg enggau raban bukai ke Singapore kena 6 ngagai 9 Julai tu tadi.
Ku iya, Perintah Sarawak deka nunda pemujur menua nya mutarka penusah bah nyadika malin dalam Pelin Pemansang Baru Bukit Assek (BARP).
Pia mega ku iya, Perintah Sarawak empu deka nyendiaka pelin iya empu tang bemalinka sistem mutarka penusah bah ti ngena teknologi ari menua nya.
“Singapore nyau deka sebaka enggau Sibu mega bisi tanah emperan sereta suah napi penusah bah tunggal suba.
“Teknologi ke dikena sida ngaduka sistem ai udah mujur mutarka penusah bah,” ku iya nerang.
Chieng mansutka jaku nya pengudah nyuaka chek Projek Mit Pemansang Menua Pesisir (MRP) ngagai 26 gerempung ukai dikuasa perintah (NGO), Hari Minggu tu tadi.
Chieng madah, pelin nya ila ukai semina mungkur sitak Bukit Assek tang mega sitak besemak dia baka Pelawan, Dudong enggau Nangka.
Iya madah, pelin tu ukai semina mutarka penusah bah di Bukit Assek aja tang mega ba sitak bukai.
“Pelin tu mungkur semua Sibu ke deka digaga enggau manah agi sereta mutarka penusah tu,” ku iya nerang.
Dulu ari nya, deligit nya udah diberi penerang pasal pemesai guna ngempung pemansang taman enggau landskap mengeri lalu ngaduka sistem ai sereta inisiatif mutarka penusah bah baka ngaga selapat bah ba pasar enggau mengeri.
Raban deligit mendingka bemacham penemu baru nya lebuh nyempulang Abang Johari ke Singapore.
Deligit Abang Johari mega mendingka taklimat ari perunding taman bepalan di Denmark pasal konsep enggau langkar tengkebang sereta pemujur ngaga selapat bah kelimpah mantaika pemujur projek bukai sida ba serata dunya.
Taklimat nya mega ngelansa pasal pemansang baru sitak Bukit Assek pemesai seluas 200 hektar di Sibu sereta konsep ke nyau deka sebaka dikena ngemansangka komuniti semak endur bejalaika projek nya.
Sama nyempulang Premier Sarawak iya nya Sapit Premier Sarawak, Datuk Seri Dr Sim Kui Hian, Sapit Menteri Pelajar, Inovasyen enggau Pemansang Penau, Dr Annuar Rapaee sereta Sapit Menteri Pengerai Mensia Mayuh, Pengawa Berumah enggau Kaunsil Kandang Menua Michael Tiang Mee Ting.
Sama bisi datai, Pemangku Sekretari Perintah Sarawak, Datuk Seri Mohamad Abu Bakar Marzuki enggau tim BARP betuaika Chairman Majlis Perbandaran Sibu (MPS) Kaunsilor Clarence Ting Ing Horh.
