Penerang Guan Eng ngasuh orang takut

KUCHING : Penerang dipansutka Lim Guan Eng pasal Sarawak deka bankrap tu pengawa ti salah, deka ngeruga sereta ulih ngasuh peranak enggau pemeranak puku berasai takut.

Kaban Kaunsil Tinggi Parti Pesaka Bumiputera Bersatu (PBB) Datuk Ahmad Ibrahim madah Menteri Wang nya patut ngemetulka penerang iya lalu minta ampun ngagai rayat Sarawak enggau Malaysia laban pekara tu ulih ngeruga pengandal pemeranak puku menua luar enggau dalam menua kelebih agi ngeruga ekonomi menua tu.

“Tu petenah ti salah. Iya patut dibuai kereja laban deka mai pengerugi ngagai pekara wang menua kitai,” ku Ahmad Ibrahim dalam siti penerang, sehari tu.

Ahmad ti nyadi Sapit Chairman Kaunsil Kandang Menua Padawan (MPP) madah penerang Sekretari Besai Parti Tindakan Demokratik (DAP) tu mega enda arapka inisiatif perintah Sarawak lebuh ngemansang sitak menua pesisir.

“Iya enggai sitak menua pesisir Sarawak dikemansang, tang deka sitak tu enda maju sereta seranta.. tu meh agenda DAP,” ku Ahmad.

Datuk Ahmad Ibrahim

Nambahka nya, iya nyikap Lim ti nyadi Menteri Pekara Wang puntan ngereja pengawa lebuh ekonomi menua majak nurun lebuh Pakatan Harapan (PH) nyadi pemerintah menua tu.

Ahmad madah, Lim patut sedar pasal Sarawak tu sebuah nengeri ti dirikod ngembuan ekonomi pemadu manah di Malaysia seraya lebih manah ari Pulau Pinang lalu tu pekara tu dibantaika dalam ripot Ketuai Audit Menua.

“Maya Pengawa Bepilih Besai ke-14 madah Malaysia deka bankrap ketegal Najib tang udah sida menang ekonomi majak nurun.

“Diatu Sarawak deka bejalaika Pengawa Bepilih Nengeri(PRN) pan iya madahka Sarawak deka bankrap. Iya (Lim) agi ngena chara ti sama.

“Iya deka ngempu Sarawak dikena ngemansangka Malaya aja kelebih agi ba Pulau Pinang, Melaka enggau Perak,” ku Ahmad.

Lim rambau pengawa makai malam ngumpul pupu DAP Sarawak kemari madah, nengeri tu deka bankrap dalam kandang tiga taun di baruh pemerintah Gabungan Parti Sarawak (GPS).

Iya madah, Sarawak deka pungkang penatai pemisi dalam kandang tiga taun ngena agih belanja ninting taun penyampau RM11 bilion, rizab RM30 bilion Taja pia, Kepala Menteri Datuk Painggi Abang Johari Tun Openg madahka taun nyin kemari, asil nengeri ungkup taun 2019 diperambu manggai RM10.51 bilion nyengkaum chukai jual produk petroleum penyampau RM3.84 bilion.

Ku iya, Sarawak mega ulih nikika chukai jual nengah produk petroleum nitihka konstitusyen nengeri.