Penerang LGE ungkup tuju politik

“Ulah iya nya enda bebasa sereta berupai nadai nyukung pengawa pemansang Sarawak kelebih agi menua pesisir.”

BAU: Penerang dipansutka Menteri Wang Lim Guan Eng (LGE) nya semina ungkup tuju politik enggau provokasi.
Menteri Pelajar, Sains enggau Pansik Teknologi, Sarawak Datuk Seri Micheal Manyin Jawong madah penerang LGE nya sigi udah nyemetak politik enggau provokasi.

“Iya ti nyadi Menteri Wang Malaysia patut nyukung pemansang ti benung digaga Perintah Sarawak laban enti Sarawak mansang Malaysia pan mansang.

“Ulah iya nya enda bebasa sereta berupai nadai nyukung pengawa pemansang Sarawak kelebih agi menua pesisir,” ku iya.

Manyin munyi nya rambau ditanya pemberita lebuh nyadi temuai dipebasa Pengerami Gawai Dayak Renggat Nengeri Sarawak (Pelilih Bau) di Balai Suarah Bau ditu, Hari Enam tu tadi.

Kelimpah nya, iya madah jaku LGE nya deka meri empas ngagai ekonomi Sarawak.

“Jaku iya ti baka nya deka meri empas ngagai ekonomi Sarawak.

“Bajet bagi dua taun deka datai bedau dipadahka agi ari ni iya nemu kitai deka bankrap?” ku tanya iya.

Manyin nekanka LGE patut meri perati ngagai danji ti udah digaga Pakatan Harapan sebedau tu ngagai Sarawak.

“LGE patut meri perati ngagai danji Pakatan Harapan ti bedau digaga ngagai Sarawak baka tax enggau royalti minyak.

“Sapa iya berani bejaku munyi nya ngagai kaban aku (GPS)? Suba nyebut nama Najib diatu madah Sarawak deka bankrap,” ku iya nyindir.

ANANG BEJAKU SENGAPA… Datuk Micheal Manyin (tengah) begulai enggau bala ketuai raban bansa Bidayuh (ari kiba) Dr. Simon Sinang Bada, Datuk Ik Pahon, Adun Serumbu, Miro Simoh, Datuk Ranum Bena, Datuk Micheal Manyin, Datuk Henry Jinap enggau Datuk Peter Nansian mantah penerang Menteri Wang Malaysia, Lim Guan Eng.-Gambar Ghazali Bujang

Suara Sarawak