Pengabang Hari Krismas ditatak 20 iku aja

KUCHING: Pengerami ngintu Hari Krismas semina dikemandarka ba hari keterubah (25 Disember) aja lalu penyampau tubuh pengabang ti tau datai semina ditatak 20 iku aja maya datai ngabang.

Komiti Penyangga Penusah Nengeri (JPBN) madahka Atur Standard Pengawa (SOP) ngabang maya hari besai tu ulih dipeda ba laman web rasmi Unit Pekara Pengarap Bukai (Unifor).

Kelimpah ari nya JPBN kemari mega madahka, rumah urut enggau palan refleksologi orang buta dikemendarka muka dagang sida bepun 21 Disember nitihka atur ti udah ditetapka.

Ba lansa sama, bisi siti kes positif Covid-19 baru dirikodka ba Kuching kemari ke alai penyampau kes positif di menua tu nambah 1,085 kes.

Kes tu ngaul siku lelaki peranak menua ti baru pulai ari palan bisi risiko dirampit Covid-19, ari menua Sabah.