ARTIKEL

Pengajar nempa nembiak mereti, nyulut

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

MAYA aku agi mit suba, ba pun taun 70-an, kami sebilik pindah nitih apai aku ke ngajar ba sebuah sekula primari di Nanga Tajam, Sungai Oya, enda jauh ari Sekuau.

Ketegal kelalu manchal, aku ke beumur lima tahun maya nya selalu diukum iya duduk ba kelas enggau nembiak Primari Satu!

Apai aku, Felix Bohari, endang pengajar ti dilatih ba Batu Lintang Teachers’ Training College, Batu Lintang di Kuching.

Diatu palan nya dikelala enggau nama Institut Pendidikan Guru Kampus Batu Lintang tauka Palan Penarak Pengajar Kampus Batu Lintang.

Taja pia apai aku enda lama nyadi pengajar

.

KENANG MANIS… Pengerami Hari Pengajar SMB Sacred Heart Taun 1994.

Ketegal penanggul pengerai, iya nukar pengawa ari Opis Pelajar ngagai Opis Pemadah lalu dipindah ngagai Kapit.

Aku tama ngagai Primari Satu di Sekula Primari Methodist Kapit ba taun 1974.

Seminggu pengudah aku tama Primari Satu, aku nurun ke sekula tang dua iku bakih sekelas mai aku enda nurun lalu bemain ba panggau padang main bul enda jauh ari sekula.

Pemulai aku ke rumah ari pengawa ti enda manah nya, aku belanda lalu enda mukai-mukai kaki aku ditebak paku lawang.

Ketegal nya meh aku ditemu enda belajar sehari nya. Nama agi deh, nyida meh apai indai wai!

Bisi sebulan pia aku enda nurun sekula ketegal enda ulih bejalai.

Udah aku gerai lalu ulih nurun baru ke sekula, bala kaban sekelas udah nemu macha enggau ngira. Aku aja bedau ngelala ABC enggau 123.

PENELAP PENGAJAR

PUH… Niang Brother Albinus (dua kanan) muka palan tuisyen ngajar nembiak seranta ba menua pesisir semak Kuching.

Pengajar George Segie (diatu niang) lalu meri perati ngajar aku macha enggau ngira nyentuk ke aku pandai.

Nyentuk ke sehari tu, aku agi ingat ke pengajar ti ngajar aku nya ba Primari Satu enggau Dua. Pengajar bukai enda aku ingat.

Tang sebedau aku ampit tama ngagai Primari Tiga, kami sebilik pindah ke Sibu nitih pengawa apai.

Taja pia, nyentuk sehari tu, aku agi ingat ke penelap niang Pengajar George Segie ngagai aku.

Aku benasip manah laban pengudah aku belajar ba sekula sekondari lalu manggai bujang, aku bekaban enggau bala anak niang, kelebih agi Methodius enggau Peter Segie, laban ke sama belajar ba Sekula Sekondari Sacred Heart di Sibu.

Pengudah nya, aku suah mega betemu lalu begulai enggau niang ke endang mela Tuhan ba gerija pengudah iya pinchin.

Niang George Segie nya siku pengajar ke baruh ati, nelap sereta taluk ke Allah Taala.

Aku ingat ke mua iya ti semampai tuchum. Tu pelaba aku laban ati iya rurus.

Pengudah kami sebilik pindah ke Sibu ari Kapit, aku dulu tama ngagai kelas Primari Tiga ba Sekula Primari SUDC No. 4 (diatu SK Perbandaran Sibu No. 4).

Ba sekula nya, aku ingat ke siku pengajar indu China, Madam Lee, ke manah sereta sabar ngajar aku jaku Mandarin.

KENANG ENGGAU PENGAJAR

BROTHER ALBINUS O’FLAHERTY

Tang ba Primari Empat, apai nama ke aku ngagai Sekula Primari St Mary.

Dia aku diajar bala pengajar, nyengkaum siku indai sembiang, Sister Ignatia, reti disiplin enggau jalai pengarap Kristian.

Abis pelajar ba renggat primari, aku tama ngagai SMB Sacred Heart.

Ba sekula nya meh aku ditempa bala pengajar ti nyulut ba pengawa sida, kelebih agi prinsipal sekula maya nya ke ibuh amat ke pemujur kami dalam pelajar enggau lumba.

Brother Albinus O’Flahert,y siku ‘La Sallian Brother’ ke datai ari Ireland.

Iya enggau sekeda ‘religious brothers’ nyerah ke pengidup sida ngagai pengawa ngajar nembiak, kelebih agi sida ke seranta sekali ke nya ba mengeri tauka ari menua pesisir.

Raban ‘La Sallian Brothers’ chukup terit ba atur disiplin tang maya agi biak suba, kami bala nembiak enda mereti ke kebuah sida baka nya.

Buk enda tau panjai, nitih jam lalu enda tau laun (enti laun diukum bediri ba luar kelas), baju enggau tanchut meseti kemas, meseti nitih pengawa lumba (enti enda nurun, Brother Albinus ngiga ke rumah), nurun ngagai library maya malam hari.

Ditemu Brother enti kami bekedayau di pasar maya malam hari laban Pasar Sibu maya tahun 80an enda besai. Iya suah nginjau motosikal siku pengajar India dikena iya musin pasar Sibu!

RETI DISIPLIN

NURAI SEJARAH… Thomas Edison tu siku nembiak ti chukup tebilang enggau pegari diajar indai.

Udah kami besai lalu bulih pengawa, baru kami mereti ke kebuah penerit atur sida lalu nyentuk sehari tu, kami amat beterima kasih ngagai sida.

Aku diajar sereta diembing Brother Albinus ari Form Satu ngagai Form Enam Baruh sebedau aku nampung pelajar ba palan pelajar tinggi di Kuching.

Iya ukai semina ngajar pasal bemacham subjek, tang kelebih agi ba senentang pengidup ti ditempa ari pengawa baka lumba, kelab rama enggau gerempung pengarap enggau pengasih, ngambi kami ransing, mereti, bebasa ke orang bukai sereta nyulut.

Ari nya meh aku ngasai ke diri bulih pelajar ti meruan tauka mungkur semua pekara dalam pengidup.

Sehari tu mega aku ingat ke niang menyadi aku, Stanley Bohari, ke endang pengajar lalu ampit mangku pengawa nyadi kepala pengajar, enggau niang aya aku, Anum Mering, ke mega pengajar ti manah lalu semampai meransang bala nembiak di Kanowit belajar bebendar.

Aku besampi ngambi ke seduai diau enggau lantang ba menua serega.

Aku besampi mega ke aya aku, Pengajar Henry Antalai Mering, ke ngajar di Kanowit, enggau mayuh kaban enggau bakih ke nyadi pengajar, ngambi sida gerai nyamai lantang senang, gayu guru nguan pelajar enggau nembiak menua.

HARI PENGAJAR 2023

Taja ba selampur dunya, bala pengajar dirami kena 5 Oktober ninting taun, Hari Pengajar endang diintu kena 16 Mei ninting taun di Malaysia.

Iya diintu ngambi meri pengelala ngagai bala pengajar ke udah ngereja pengawa ti beguna amat dikena nempa bansa enggau menua.

Haribulan 16 Mei dipilih nyadi Hari Pengajar di Malaysia laban sehari nya ba taun 1956, Kaunsil Undang-undang Persekutuan Tanah Melayu nerima perambu nengah Ripot Komiti Pelajar ti nyadi Polisi Pelajar menua kitai.

Pekara nya udah nya nempa Polisi Pelajar Nasional tauka dikelala enggau nama ‘Razak Report 1956’.

Hari tu diintu mega laban ngemerat ke pengawa pengajar ti nempa penyerakup enggau kaul raban bansa, pemansang menua sereta servis ngagai komuniti.

Iya mega dikena narit perati apai indai, bala nembiak enggau mensia mayuh ngagai pengawa besai bala pengajar dalam komuniti di Malaysia.

Sehari tu mega bala pengajar tau ngasai ke kaul manah entara sida lalu ngemanah pendiau enggau tikas sida dalam komuniti.

RAMBAI JAKU HARI PENGAJAR

Rambai jaku ‘Guru Insani Pemangkin Generasi Madani’ dipilih Menteri Pelajar Malaysia enggau konsep ngangkat semengat sereta roh pengajar ngambi nyagu pengawa pengajar ti bepelasar ke Filosofi Pelajar Pengajar ba pengawa nempa menua bansa.

Ia mega ngenati ke penyikap pengajar nyukung juluk Filosofi Pelajar Pengajar enggau ngemerat ke pendiau diri sereta pengerindu ngagai menua, semengat enggau roh pengajar sereta penemu enggau pengelandik.

INDAI MEGA PENGAJAR

DIAKU… Jalai Brother Albinus kelai pengaku ti diberi ngagai siku pengemeran pelajar ke nyulut.

Hari Minggu tu tadi, kitai ngerami mega bala indai.

Apai enggau indai kitai endang pengajar keterubah kitai. Enti ukai seduai, aki ini tauka aya ibu mega nemu ngajar kitai, tang ke tebal agi sida ke indu endang ngembuan penteba pengajar.

Bisi siti cherita pasal penengkebang tebilang, Thomas Edison ke nengkebang lampu elektrik tauka ‘light bulb’.

Bisi sekali maya iya agi mit, Edison pulai ari sekula lalu nyua selambar keretas ngagai indai iya.

Iya madah ngagai indai iya, “Indai, pengajar aku meri keretas tu ngagai aku lalu madah ngagai aku semina nuan aja ulih macha iya. Nama utai ku surat nya?”

Indai iya nyabak maya iya macha surat nya ngagai anak iya.

“Anak nuan siku genius (orang ke pandai amat). Sekula tu kelalu mit endur iya lalu nadai pengajar ti chukup landik ngajar iya. Nuan empu meh ngajar iya.”

Betaun-taun pengudah indai Edison midang, Edison nyadi siku penengkebang pemadu tebilang ba abad ke-20.

Bisi sekali, iya benung ngiga barang ba siti lemari lalu tetemu ke surat ti ditulis pengajar nya suba ngagai indai iya.

Iya muka surat nya lalu utai ti ditulis ba surat nya munyi tu:

“Anak nuan bisi penimpang runding (mental deficiency). Kami enda ulih ngemendar ke iya tama sekula agi. Iya udah dibuai ari sekula.”

Edison pen berasai sinu ati macha surat nya lalu nulis dalam diari iya:

“Thomas Edison siku anak biak ti timpang runding tang indai iya ngubah iya nyadi genius pemadu tebilang ba abad tu.”

Nya meh kebuah indai dikumbai bisi kuasa ngubah nasip anak ari enda manah nyadi manah.

NEMPA ANAK PANDAI SERETA MERETI

Semua apai indai deka ke anak sida pandai, landik, mereti, manah ulah, bagas ganas, sereta bebasa ke sida enggau mensia bukai, kelebih agi sida ke tuai.

Kitai besampi ngambi mayuh agi bala pengajar, nyengkaum pengajar Dayak, ulih nyaup apai indai nempa anak kitai nyadi mensia ke menyana, pandai, nemu berunding sereta ngembuan ati ti rurus.

Selamat Hari Pengajar!

BERITA LAIN

Boleh kritik kerajaan tetapi ada had dalam isu 3R

KUALA LUMPUR: Walaupun kritikan terhadap kerajaan dibenarkan di Malaysia, Perdana Menteri Datuk Seri Anwar Ibrahim mengaku terdapat had kepada kebebasan media, terutamanya berkaitan perkara sensitif

BERITA TERBARU

17,034 warga emas Jepun meninggal sendirian

TOKYO: Satu tinjauan terkini oleh Agensi Polis Kebangsaan Jepun (NPA) menunjukkan bahawa 17,034 warga emas yang tinggal bersendirian meninggal dunia di rumah di seluruh negara

Pertingkat usaha bantu PKS tembusi pasaran luar

SAMARKAND: Usaha membantu perusahaan kecil dan sederhana (PKS) Malaysia menembusi pasaran luar negara perlu dipertingkat bagi mengangkat kedudukan syarikat berkenaan, kata Perdana Menteri Datuk Seri