Pengajar Tadika mujur nitih SOP ditetap

KOTA SAMARAHAN: Bala pengajar ba palan Tadika ditu diperati chukup ngemeratka Atur Pengawa Standard (SOP) ti udah ditetap.

Lebuh pemberita Suara Sarawak ngabas tadika nya pukul 7 pagi tadi, semua anak mit ti tama ngagai tadika deka dulu diperesa pengangat isi.

Pia mega, beg enggau utai diguna sida dalam tadika mega deka diperesa dulu nentuka sida enda mai barang ti tau ngeruga pengelikun.

Ku siku pengajar ba tadika nya, apai indai semina dikemendar nganjung anak sida ba luar pagar tadi enggau ngelepaska anak sida ngagai pengajar dia.

Kelimpah ari gari enggau kain mandi, barang baka utai keayam enggau kutak pinsil mega enda dikemendar dibai tama enggau diberi baru ngagai apai indai tekala nya.

Udah nya, bala anak mit diasuh nusun kasut sida empu enggau ngena penuchi jari sebedau tama ke kelas.

Ketegal pengusung enda dikemendar tama ke tadika, sida semina ulih merati ba luar pagar enggau beratika penerang ti diberi bala pengajar.

Lebuh ditanya pasal penuduk anak mit lebuh belajar enggau makai, pengajar nya madahka anak mit duduk ba bangku sida empu enggau takah semeter.