Pengaji dipinta ngerejister nama staf ungkup tuchuk vaksin sebedau 12 April

KUCHING: Komiti Penyangga Penusah Ngenyit Nengeri (JPBN) ngerah semua pengaji ngerejister nama pengereja sida sebedau 12 April dikena ngelancharka pengawa vaksin Covid-19.

JPBN dalam siti penerang media kemari madahka pengaji ari sektor servis, hotel, kunterik, ‘pembuatan’ enggau ladang mesti ngerejister nama pengereja sida ngagai Opis Residen Bagi Menua besemak sebedau timpuh nya.

Kemari, Sarawak ngerikodka 267 kes baru positif Covid-19 ngujungka penyampau kes positif di menua tu nambah 15,443 kes.

Kes positif baru tu dirikodka ba Pelilih Menua Sibu (49), Bintulu (44), Miri (40), Samarahan (31), Kuching (19), Serian (19), Bukit Mabong (13), Julau (10), Kanowit (8), Kapit (7), Sri Aman (7), Beluru (7), Meradong (3), Sarikei (3), Song (3), Marudi (1), Matu (1), Pakan (1) enggau Tanjung Manis (1).

Ku penerang nya, ari 267 kes baru tu semina 26 iku aja bisi nunjukka kelai kena rampit Covid-19 lebuh beperasa.

Pia mega, JPBN madahka Pelilih Menua Matu, Pakan enggau Marudi bebali ari status gadung ngagai kuning kemari pengudah ngerikodka siti kes berampit.

Nangkan nya, Pelilih Menua Bukit Mabong bebali ari status kuning ngagai oren kemari pengudah 30 kes berampit dirikodka.

Taja pia, Pelilih Menua Subis bebali pulai ari status oren ngagai kuning pengudah semina ngerikodka 18 kes berampit dalam kandang 14 hari.

Suara Sarawak