Penganjung pemakai meseti beperesa pengerai

KUCHING: Semua raban ti gawa nganjung pemakai sekumbang Atur Tagang Pejalai (PKP) dipinta meseti datai beperesa pengerai, ku Datuk Seri Ismalil Sobri Yaakob.

Menteri Kanan (Kluster Pengelikun) madah, Opis Menteri Perengka Pengangkut deka mansutka gerah ngagau semua 41 serikat e-hailing ke benung beoperasyen nyengkaum restauran ti deka nerima gerah ari Opis Menteri Dagang Dalam Menua enggau Pekara Penguna.

Ungkup sitak menua pesisir ke nadai nerima servis 41 serikat e-hailing nya, tauke kedai makai nya ulih ngena servis serikat bukai tauka sesiku orang.

Taja pia, penganjung pemakai nya meseti berejista enggau Opis Kaunsil Kandang Menua (PBT) kelimpah meseti beperesa pengerai ba klinik perintah tauka sepital peribit ke besemak.

“Atur baka tu digaga digaga dikena nentuka pengelikun semua piak nyengkaum mensia mayuh.

“Enggau jaku puntang ditu, pengawa muka bansal mit tauka bazar Ramadan betugung sigi enda dikemendar sekumbang PKP,” ku iya nengah sebengkah aum pemberita di Putrajaya, kemari.

Berebak enggau nya, Ismail madah perintah nadai neritka atur meseti nguna sengkabung mua ngagai barang sapa orang ti nadai kelai sakit.

Nya alai, iya ngelalau semua piak anang sengapa neritka atur ngagai mensia mayuh tauka sebarang orang ke gerai enti sida nadai nguna sengkabung mua.

Suara Sarawak