KUCHING: Gempung Parti Sarawak (GPS) begunaka pengari raban bansa China dalam numbuhka perintah.
Chairman GPS Datuk Patinggi Abang Johari Tun Openg ngelalau raban bansa China di Dun Batu Kawah ngambika berunding manah dalam Pengawa Bepilih Besai Nengeri (PRN-12) ti deka datai.
“Kami deka bansa China dalam perintah. GPS enda ulih numbuhka perintah enti pengari ari raban bansa China nadai,” ku iya.
Abang Johari bejaku munyi nya lebuh Bejadika Taman Riverbank Batu Kawah ditu tadi.
Ku iya, bansa China mesti berserakup dalam perintah ti deka ditumbuh.
“Penyandang Dun Batu Kawah Dr. Sim (Datuk Seri Prof Sim Kui Hian) enggau bala iya mesti bisi din ila (dalam kabinet nengeri) awakka ulih ngemansangka menua.
“Mayuh agi pengawa kami, aku deka nyirika iya (Kui Hian) nyaga Sekula Bansa China, diatu agih belanja RM10 juta otomatik diberi ngagai Sekula Bansa China,” ku iya.
Iya mega madahka penyandang Dun Batu Kawah nya endang siku ti bebendar gawa sereta meri servis ngagai rayat ditu.
Kelimpah ari nya, iya mega ngelalau raban bansa tu ngingatka sempama ‘anang ngasuh pisang bebuah dua kali’.
“Chukup meh bebuah sekali aja, nya alai aku madah ngagai kita semua raban bansa China sukung meh Parti Sa’ati Rayat Sarawak (SUPP) nyadi bakih GPS.
“Baru kitai nyamai ngemansangka menua. Enda ngira dini-dini alai, pemansang endang benung digaga kami, nitihka jaku nyema kami nyebut, kami ngaga (when we say it, we deliver),” ku iya.
