Pengari rayat anang bulaka semaya diri – Tun M

SHAH ALAM : Ex-Menteri Besai, Tun Dr Mahathir Mohamad nangkan pengari rayat anang bulaka semaya diri ba Pengawa Bepilih Besai (PRU) ke udah sereta pengandal ke udah milih sida.

Iya ke mega Kaban Parlimen Langkawi madah, rayat bisi hak nerima perintah lama tauka nukar parti perintah lalu orang politik mesti bebasaka majoriti rayat.

“Penanggul ba menua kitai, pengudah rayat milih perintah, bisi chara sida dikena ngalihka utai ke udah dipilih rayat. Tu diasaika aku utai ke enda manah, enda patut digaga laban kitai udah ngaga semaya enggau rayat, ketegal sukung rayat ngagai kitai nya kitai ulih menang.

“Kitai mesti ngamatka semaya, tang taja kitai udah besemaya, kitai ngena penuduk (kuasa) kitai nya dikena ngalihka utai ke udah dipilih rayat. Tu enda manah, tauka bisi chara dikena ngereja ulah nya, kitai sigi enda patut ngereja nya. Kitai patut bepanggai ngagai prinsip,” ku iya rambau forum khas dikumbai ‘Wawasan 2020’ malam ensana.

Iya nyaut tanya bekaul enggau ulah sekeda pengari rayat ‘merejuk parti’ dikena meri sukung ngagai ex-Kepala Menteri Sabah, Tan Sri Musa Aman ke nguji numbangka perintah Sabah diiring Parti Warisan Sabah (Warisan).

Dr Mahathir madah, pengari rayat enda patut ngubah runding enggau prinsip sida taja parti ke dititih limpang ari tuju asal tauka penumbuh parti.

“Nama pekara ke nyadi kekadang ukai ketegal parti tang jaku manis piak seberai. Kitai enda ingat danji ke udah disemaya ngagai. Kitai nyau ninggalka parti kitai. Tu enda manah ungkup sebuah menua demokratik laban kitai nyau enda ingatka semaya diri ngagai rayat,” ku iya.

Suara Sarawak