Pengari rayat GPS besaup mantu peranak Rumah Noh

TANJUNG MANIS: Nasip 56 peranak Rumah Noh Bin dituntung penusah angus rumah kemari diketati pengari rayat sitak nya.

Sinuka nasip sida ti tasah, Adun Kuala Rajang, Datu Len Talif Salleh enggau Kaban Parlimen Tanjung Manis, Yusuf Abd Wahab besaup mantu ngelempungka tating penusah.

Bantu udah dianjung bala pemesai palan servis komuniti seduai empu tumu pagi tadi.

Len Talif ti mega Menteri Muda Pemansang Mengeri enggau Pengeraja Asal madahka ba penusah ngenyit urung pukul 7.30 malam kemari ngujungka semua sida serumah semina tinggal gari ba punggung aja.

“Nitihka penerang, sida serumah nadai ulih nyelamat keresa bukai kelimpah ari tubuh diri empu. Nasip amat nadai sebarang penusah bebadi nyawa tauka bakal nyadi.

“Kitai udah nganjung bantu ngenyit kin kelimpah deka beratika bantu bukai udah tu,” ku iya madah ngagai Suara Sarawak, tadi.

BANTU NGENYIT… Bala pemesai ari Palan Servis Komuniti ngarika Len enggau Yusuf nganjung bantu ngagai peranak Rumah Noh, pagi tadi.