KUCHING: Pengawa Bejalai Bebala Mayuh serimbai Ngintu 60 Taun Sarawak Merdeka deka diatur ba Kuching kena Hari Enam tu.

Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting Chiew Yew madah, pengawa nya mega deka diatur ba Sibu kena 12 Ogos seraya ba Miri kena 19 Ogos.

“Bisi 60 kontinjen deka ngambi bagi ba tetiap pengawa nya nyengkaum pengari ari ejensi perintah nengeri, palan pelajar, sekula enggau raban peribit.

“Sama ngaul diri kontinjen nya pengari ari Komiti Pemansang enggau Pengelikun Genturung Pendiau (JKKK), pengari raban bansa enggau gempung ukai dikuasa perintah,” terang iya.

Sebastian Ting bejaku munyi nya rambau aum pemberita Pengawa Bejalai Bebala Mayuh serimbai Ngintu 60 Taun Sarawak Merdeka ba opis iya ba Baitulmakmur 1, ditu tadi.

Iya madah, tetiap pengawa nya deka mandangka penyelai sida empu.

“Ba Kuching, pengawa belalauka rambai jaku inklusiviti komuniti seraya Sibu deka mandangka bejalai mai tanglung lalu ba Miri enggau kerita behias.