MARUDI: Pengawa ngatur Karnival Serakup Indu Dayak Sarawak (SIDS) Pampang Marudi meseti nyadi pelasar besai dikena ngangkat pengawa indu Sarawak.
Ku Sapit Menteri ba Opis Premier Sarawak (Pekara Pengereja Pengawa, Imigresyen enggau Patau Projek), Datuk Gerawat Gala, pengawa ngatur karnival nya mandangka pemesai ti sikar sereta ransing gawa dalam SIDS Pampang Marudi.
“Tabi puji ngagai SIDS Pampang Marudi atas pemujur sida ngatur Karnival SIDS 2023 ti bulih sukung penuh ari semua 48 Unit SIDS ba baruh Pampang Marudi,” ku iya.
Ku Gerawat agi, SIDS Pampang Marudi chakah nulung ngerembaika penau indu seraris enggau pengawa ti dikereja Perintah Gempung Parti Sarawak (GPS) dikena ngaku sereta ngelakuka pengawa besai bala indu ba pemansang enggau pemujur menua.
“Bala indu kita begulai enggau bala lelaki deka nyadi pengerak dikena nyapai juluk pelin atur ekonomi kitai baka ti disebut dalam Strategi Pemansang Pengudah COVID-19 2030 (PCDS2030) ti datai ari buah penemu Premier Sarawak,” ku iya.
Gerawat nyebut pekara nya ba Pengawa Bejadi Program Aram Kitai Karnival SIDS Pampang Marudi ba Kompleks Lumba Marudi ditu apin lama ti udah.
Iya mega meri bantu ngagai Unit SIDS ba rumah panjai di sitak Poyut-Lubok Nibong sereta pemeri RM10,000 ungkup karnival nya.
Iya mega besemaya deka meri RM20,000 dikena ngatur aktiviti SIDS Pampang Marudi nyentuk ke taun 2024 ti nyadi kelai komitmen iya ti meruan ngagai pemansang indu Sarawak.
