NAMPUK nya siti ari pengawa asal ti dikereja kitai bansa Iban dulu kelia, ku John Adam Gilbert Anyai.

Nitihka pansik John empu ba jerita tuai kitai Iban nadai nyemetak madah ke sapa bagi petara ti ngajar kitai Iban nampuk.

“Kitai mega enda nemu sapa bagi tuai kitai bansa Iban kelia ti dulu mungkal ngepunka pengawa nampuk.

“Nyadi pengawa nampuk tu tebal agi enti dulu kelia endang pengawa ke dikereja bala pungka anak lelaki ke mutus ati sereta berani ngereja pengawa berambun ke nyawa betemu enggau petara kitai Iban ari menua Panggau Libau tauka Gelong Batu Nakong, bala antu, bansa bunsu jelu tauka utai bukai.

“Sida pechaya utai tu tau nulung medung ngarung sida lebuh maya ngayau mulau betempuh enggau bala munsuh, lalu tau mega meri kuasa ke nyelai ngagai sida kena sida nyadi tuai megai mensia mayuh enggau menua ti ngasuh sida jelai nama tampak rita ditemu orang,” ku peranak asal Serudit, Paku di Spaoh, Betong nya ngepunka kenang iya.

KEBUAH NAMPUK

John madahka kebuah orang ke ka nampuk tu suah agi bepun ari sida ke bisi kenyap tauka mimpi diasuh orang ba mimpi sida nya nampuk.

Bisi sekeda kategal ti nyau nadai daya agi kena ngubat diri empu ti udah kelalu balat raya sakit lalu ngicha kadiri tau diubat petara kitai Iban lebuh ti nampuk nya.

“Lalu ketiga endang bisi niat deka ngiga pengaruh ke gembar tubuh dikena maya ngidup kadiiri.
“Bisi mega sida nurun nampuk nitih ke dipadah sereta iring orang ti landik nenung ngambi ke pengawa sida nya mujur.

“Siti agi pengawa ke nyentuk agi kena tuai kitai Iban kelia betemu enggau orang Panggau nya dikumbai “Ngemedung”.

“Nyadi pengawa ngemedung tu reti nya orang nya ulih datai batang tubuh betemu mua enggau orang di menua Panggau Libau tauka Gelong Batu Nakong,” ku John ngerintai kebuah orang nampuk.

MENUA KALA ENDUR NAMPUK

Nampung kenang ke ujung agi, John madahka alai endur orang suah nampuk nya baka endur ke tampak rita selalu didinga bisi endur orang Panggau Libau tauka Gelong Batu Nakong dipeda orang ngayan kadiri dalam mimpi tauka dipeda nyata.

Ambika chunto, menua suah ditapatka endur nampuk nya baka ba tuchung bukit ti tinggi sereta benama.

“Ba wong ti tinggi sereta benama ke ditemu bisi petara tauka antu nguan tauka Bunsu Telanjing.

“Kelimpah ari nya, menua ke ditemu bisi lubang batu tauka gua ke dikumbai orang Lubang Remaong mega suah dilawa orang ke nampu.

“Pia mega ba entigis ulu sungai, tanah mali, pulau, pendam tuai, pala lubok enggau ba endur bukai nitih ke dipadah antu dalam mimpi tauka dipadah tukang tenung,” terang John lenak.

PENTI PEMALI

John ti ngentapka pendiau diri ba Rumah Undi, Sungai Kemuntang, Brayang di Roban madahka orang ka nurun nampuk tu ukai nya tau nurun nitih ke peneka ati.

Sida ti deka nurun nampuk mesti nitihka pengelantang kenyap diri, meda dulu gaya hari enggaika musin pengujan.
Gaya bulan di langit enggau utai dipadah tukang tenung ti dikena sida mega mesti dipending enggau dititih enggaika napi penanggul tauka penusah, ku iya.

Ba pengawa dikereja kena nyendiaka diri ti deka nampuk mesti ngembuan penemu enggau ati ti lurus sereta niat ati ti manah ka nampuk.

“Kitai mesti nemu dini endur ke deka dituju nyadi ke alai ka nampuk kelimpah betanyaka penemu ngagai orang mayuh bekaul enggau endur ti ka alai nampuk.

“Ambika chunto baka penti pemali menua nya, gaya ripih piring enggau sapa bagi petara ke dipelaba bisi nguan endur ti ka alai nampuk nya.

“Seminggu sebedau nurun nampuk, orang ti ka nampuk mesti nemu nagang diri ngereja semua pengawa ke enda manah, nyengkaum beleman enggau orang indu tauka ngemabuk kadiri.

“Sida mega mesti nyendia ke semua kereban ti patut diguna lebuh maya sida ti nampuk nitih ke atur ti patut nitih ke gaya pendiau petara ti nguan endur nya.

“Tu beguna amat enggaika pengawa salah tau ngasuh petara nadai datai ngabas sida, lalu sida pulai lebu, lalu iya ke balat agi nya tau ngasuh bulih penusah, ngasuh sakit tauka parai,” terang John nyentuk.

PERENGKA DIGUNA

Nyadi rengka diguna kena nampuk nya ku John nadai sebaka tauka bebida, nitih ke dipadah orang ba menua siti siti laban nitihka gaya pendiau petara ba endur ti ka alai nampuk.

Lalu enti nitih ke padah tukang tenung mega bisi bebida sereta kitai ke beempu batang tuboh ti ka nampuk nya mesti nemu ngaga pemutus ati nyara kadiri empu ni bagi utai ke patut dikena diri empu.

“Gaya atur ripih piring enggau rengka bukai mega bebida nitih ke gaya penuai bulu orang ke nampuk nya.

“Tu ukai seneka ati kitai ngeletak baka kitai ke begawai sandau hari tauka ngereja pengawa bukai.

“Kebuah pia laban ungkup orang ke baru nguji ngereja pengawa pungka anak lelaki enggai nyadi diselampur ke magang enggau orang ke udah tuai bulu ba pengawa nampuk.

“Tuai bulu tu enda semesti iya orang nya kala udah bedengah, udah basah jari tauka enda.

“Mayuh orang ke udah bedengah tauka selalu madah kadiri bujang berani enda mutus ati laban takut napi penguji lebuh nampuk,” ku iya ngelalau.

Nyadi rengka ke dikena nampuk nya baka tikai kena duduk, lalu bisi orang nya duduk bepelasar ke kayu, utai ke ketapu tauka labung pala, lalu bisi nya ngena selapuk betunjang tauka ditanchang ke kain bedepa aja.

Pia mega baju kena duduk maya nampuk nya sigi ngena baju ngepan kitai Iban sereta piring ke dipangkang orang nampuk nya duduk nitih ke gaya ripih ungkop ke patut dikena diri empu.

John nyemetak madah pengawa nampuk tu ukai muntang baka disebut laban mayuh utai tauka pengawa endur tau dikereja.
Tu nyengkaum nadai tau bebai ke duku tauka api semalam malam sepemanjai jam ke nampuk.

“Orang ke duduk nampuk nya enda tau semak pangan, kira ke penyauh semina bisi dipeda ari pangan diri lalu nadai tau inggar diau dalam petang nganti utai ke datai.

“Nadai tau lari enti sema utai nyelai nyadi tauka ninga utai ti tau ngasuh takut sereta enda tau tinduk laban enggaika enda nemu utai ke bisi nyadi.

“Sida mega nadai tau inggar, ngali kadiri tauka angkat sepemanjai pengawa nya sereta enda tau betunu ke sebarang utai, baka kemenyan, selukai, ubat nyamuk tauka ngaga unggun api,” ku iya ngenang pengawa nampuk.

MIRING

Ku John, Nnadi pengawa miring sebedau nurun nampuk tu dikereja orang ke ngempu batang tuboh ba bilik penaik iya empu sebedau iya nurun nampuk.

Lalu turun piring dikena iya nya nitih ke gaya ungkup piring ke patut dikena iya nurun mindah.

Kebuah miring sebedau nurun tu laban mai samengat orang ke nurun nampuk sama enggau iya lalu nyadi ke “piring kena nyukul tauka ngampun” ngagai petara ke ngempu menua, tanah, bukit, lubok, gua, wong tauka sungai ti ka alai nampuk.

Lalu bisi orang ke kur agi dia sida ngaga siti piring ngambi ke diengkah ba kaki bukit, kaki lubok, ba mua gua, ba batang sungai kena ngampun ngagai petara dia.

PENGAWA PEMUN

Sebedau belabuh nampuk dia tikai ka endur miring diachau lalu pengawa miring belabuh. Manuk ke dikena miring lalu disayat.

“Udah tembu miring, pengawa nampuk lalu belabuh ke alai orang ke nampuk nya mesti duduk besila nunga piring ke ditaga ke iya kena nunga nganti petara datai ngagai iya.

“Pengawa miring enggau nampuk tu berengkah kira jam tumbuh nyang tauka maya salah kelala lalu tembu maya matahari niki tauka udah tekerebak tawas.

“Sekumbang ke duduk orang ke nampuk nadai tau kasak-kasak tauka engkebut enda temu tungga.

“Selalu iya lebuh ke duduk tu mayuh penguji datai tang enda sebaka ba semua orang siku-siku.

“Bisi nya ngasai utai ngerayap ba sebelah tubuh lalu bisi nya ninga utai ke nyelai bemunyi.

“Bisi mega meda mata antu, ensium bau utai ti nyelai datai lalu burong bemuyi sereta mayuh agi gaya utai ke nyadi ti tau nyadi penguji.

“Orang ke nampuk nya enda tau sekali kali nepas tauka ngiar utai ke ngerayap ba tuboh sida, enda mega tau lari laban utai ke nyadi nya nanda petara ti dikangau bisi datai kia.

“Iya semina tau besampi bejaku kadiri minta utai ngagai petara nitih ke niat ati diri empu.

“Lebuh hari udah tawas orang ke nampuk enda tau lalu berumban pulai laban sida mesti berati ke piring ti ditunga pangkang sida malam nya.

“Nyangka bisi utai nyelai diengkah petara ba tikai endur duduk, ba piring, ba baruh tikai tauka bisi dipeda nyelai ngait ati sida lalu tau dibai pulai nyadi ke pengaruh,” ku John nerang gaya pengawa orang ke nampuk.

PULAI NAMPUK

Pulai orang ke nampuk sida lalu tau mai utai ke dipelaba ke sida tau nyadi pengaruh diasoh peda manang tauka orang ke nyadi tukang tenung.

Ku John, tu ngambi ke nemu utai ulih diri lalu bisi mega orang ke pulai nampuk nya bemimpi betemu enggau petara ke meri iya pengaruh nya.

Enti orang ke pulai nampuk nya bisi bulih pengaruh dia sida mesti miring kena niki ke pengaruh ngambi ke pengaruh nya lalu nyadi nitih ke guna dipadah petara.

Nyadi naka nya kenang ke ditemu aku ba pengawa kitai Iban ke nampuk ngulih ke pengaruh.